DILI, STLTIMORLESTE.com – Relasiona ho selebrasaun aniversariu dezastre naturais nian neebe sei akontese iha 30 Outubru 2024 ba dala 17, Autoridade Proteção Civil (APC) halo doasaun raan.
“Atividade doasaun raan nee ami halao atu prienxe atividade selebra aniversariu ba dezastre ninia, tanba nee ami hakarak kontribui ami nia raan ba Banco de Sangue hodi salva pasiente sira neebe baixa iha HNGV,” hatete Sekretáriu Estadu Protesaun Sivíl (SEPS), Domingos Mariano Reis ba jornalista sira iha APC, Kinta (17/10/2024).
Nia dehan, pasiente sira iha Hospital Nasional Guido Valadares (HNGV) presiza tebes raan, tanba nee ohin funsionariu hotu-hotu voluntariu hasai raan hodi oferese ba Banco de Sangue, tanba raan turuk ida bele salva ema nia vida.
“Ami sempre asesu media katak, pasiente sira iha HNGV presiza raan, ho ami nia misaun katak, servi no proteje sidadaun sira, entaun ida nee mos parte ida ami nia misaun, ho ami nia raan turuk ida mos bele salva ema seluk nia vida,” nia esplika.
Nia deklara, APC Servisu hamutuk ho OMS, HNGV, Cruz Vermelha Timor Leste, depois sira sei selebra aniversariu iha Munisipiu Atabae, tanba nee ho atividade doasaun raan.
Iha fatin hanesan, Xefe Departementu Banco de Sangue iha HNGV, Alexandrino Mendonça deklara, Banco de Sangue neebe hamahon aan iha HNGV mai halo doasaun raan iha APC, nee apresia tebes ba funsionariu sira tomak neebe voluntariu hodi fo sira nia raan.
(jen)
