DILI, STLTIMORLESTE.com – Tribunal Judisial Primeira Instansia Dili (TJPID) halao julgamentu ba arguidu nain tolu (3) ho inisail, MM, LM, no RMT, tanba baku lezadu AdJPM hanesan Funsionariu Publiku iha Bombeirus.
Tuir faktus katak, iha loron 27/1/2021, lokraik tuku 15:00, lezadu ho sira nia equipa simu informasaun husi komunidade husi area Golgota katak, iha karreta vaskolante ida tula foos bakufila iha neeba, no sira husu Bombeirus ninia apoiu, nunee lezadu ho nia kolega nain 5 (grupu ida) ba iha fatin neebe karreta baku fila ba, sira nain 6 ba atu ajuda dada los fali karreta neebe maka bakufila. Maibe antes sira too iha neeba, ema barak maka iha tiha ona fatin refere.
Kuandu lezadu ho nia ekipa atu halo ona sira nia servisu, arguidu MM maka koalia barak dehan ami la presiza ona Bombeirus, tanba nee maka lezadu ba besik arguidu MM hodi hateten ba nia katak” Se hanesan nee ami fila ona, tanba ami mai bazeia ba informasaun neebe maka hato ba iha edefisiu,”dehan akuzasaun nee.
Hafoin lezadu hateten nunee, arguidu MM dudu kedas iha lezadu nia hirus matan halo lezadu atu monu ba kotuk, maibe la konsege tanba iha kolega balu maka satan netik husi kotuk.
Iha altura nee, lezadu nia ain sorin loos mos hit sae, maka arguidu MM kaer iha lezadu nia ain nee atu halo monu lezadu, maibe nia kolega maka tahan nafatin, no la akontese tan agresaun ruma husi arguidu.
Tanba impedementu husi arguidu ho suspeitu deskonhesidu sira maka lezadu ho ninia ekipa Bombeirus mos aruma sira nia sasan tau iha karreta atu fila ona, maibe arguidu MM, RMT, LM, ho tan suspeitu deskonhesidu sira ema barak ba atake lisuk fali lezadu. Balu kaer ai, fatuk tuda no baku no balu mos tuku tebe kona iha lezadu nia hirus matan, liman sikun no kona mos lezadu nia ulun sorin karuk too kanek ran sai barak.
No lezadu ninia situasaun refere, maka lezadu nia kolega sira lori kedas ba Sentru Saude Komoro hodi hetan tratamentu mediku no suku.
Iha mumentu nee lezadu nia kolega sira seluk la hetan agresaun ruma husi suspeitu sira, maibe lezadu mesak. No lori tiha ona lezadu ba Sentru Saude maka foin Polisia ba iha fatin akontesimentu hodi kaer arguidu sira.
No deklara katak, arguidu MM dudu no tebe kona iha lezadu nia ain tur sorin loos. No arguidu LM maka kaer kapasete baku ba lezadu nia ulun too kanek, no arguidu RMT maka tuku kona iha lezadu hasan sorin loos.
Arguidu sira nia asaun nee maka lezadu ho nia ekipa Bombeiros la dada kareta neebe baku fila no tula fali lezadu fila fali tiha deit ba sira nin servisu fatin.
Bombeirus ba halao servisu Estadu nian atu ajuda komunidade neebe husa ajuda, nunee arguidu sira impede too hamosu lezadu hetan kanek no moras.
Kona-ba problema refere, iha dia 29/1/2021, dadersan Xefe Suco Komoro, Xefe Aldeia ho delegadu Suku nian, ba deit iha lezadu nia servisu fatin husu tiha ona diskulpa, no promete atu hasoru malu hodi rezolve tuir dalan familia tanba sira mesak sei vizinhu.
Arguidu RMT, LM no MM hakarak ho intensaun impede no halo agresaun fizika kontra fuasionariu Bombeirus ninia servisu, hodi kauza lezadu hetan kanek, bubu, moras iha zona atinjidu.
Arguidu sira hatene katak, impede funisonariu kompetente too la bele halao sira nia funsaun, nuudar aktus krime obstrusaun ba autoridade publika, tanba nee kontra lei no hetan kastigu penal.
Ho nunee, arguidu sira hanesan autor Material ho forma konsumada, hodi pratika krime ida obstrusanu ba autoridade publika neebe previstu no punidu tuir artigu 243 husi Kodigu Penal.
Hatan ba faktus nee arguidu RMT deklara katak, kona-ba dehan arguidu tuku lori liman nee lalos, maibe konaba karreta ida monu nee loos, no arguidu mos ajuda hiit foos neebe iha, no arguidu too iha fatin refere Bombeirus seidauk iha neeeba.
Arguidu deklara tan, kona-ba se maka telefone Bombeirus arguidu la hatene, no arguidu hare arguidu nain rua seluk mos iha neeba. Momentu neeba arguidu hare no rona lezadu ho arguidu MM maka diskuti malu, no karreta nee monu besik sira nia uma.
Tuir arguidu, iha tiha fatin akontesimentu 30 minutu maka Bombeiros foin too, no hare lezadu no arguidu MM diskute malu kona-ba atu kesi tasi iha besi rin hodi dada kareta, maibe arguidu MM lakohi tanba se kesi iha besi rin nee monu kona arguidu MM nia uma.
Arguidu deklara tan, lezadu maka dudu uluk arguidu, tanba nee arguidu mos dudu fali lezadu, kona-ba tuku arguidu la tuku ida, depois arguidu fila ona kona-ba dehan baku lezadu, arguidu la hatene ida.
Nunee mos arguidu LM deklara, kona-ba dehan lori kapasete baku lezadu nee lalos, maibe konaba kareta neebe monu loos tanba besik sira nia uma, no arguidu sira ajuda lalin sasan sira neebe monu tun husi karreta, no liu tiha oras ida maka Bombeiros foin mai.
Arguidu deklara, kuandu Bomberos sira too mai seidauk iha problema, maibe depois iha problema ho arguidu MM diskute malu ho lezadu, arguidu la hatene ida, no diskute malu konaba saida mos arguidu la hatene, maibe ikus maka rona dehan kesi tali ka katrol ba eletrisidade nia rin arguidu MM la aseita maka mosu problema.
Kona-ba arguidu MM tuku lezadu nee, arguidu la haree ida, tanba rona ema barulu tauk arguidu mos halai.
Arguidu deklara, kona-ba lezadu no arguidu MM diskute malu arguidu la haree, tanba ajuda aruma lalin hela sasan sira neebe monu husi kareta.
Aleinde nee arguidu MM deklara katak, momentu neeba karreta monu nee loos, besik arguidu nia uma oin, no arguidu mos iha uma hela. Karreta monu tiha iha foos nakonu, tanba nee sira husu ajuda ba hatun foos sira nee, no kareta Bomberus mai husi Tasi Tolu la lori material dada karreta, depois populasaun sira maka informa ba konaba karreta monu tanba nee maka sira mos ba foti tali.
Arguidu deklara, Bomberus sira dehan atu kesi katrol ba iha besi rin, arguidu la hatan dehan kesi ba iha ai kakeu, iha Bombierus nain lima aseita lezadu maka la aseita, no lezadu hakarak kesi ba iha jambua hun ida, arguidu la aseita atu kesi iha jambua hun tanba nee maka lezadu la simu mai tolok arguidu no tebe arguidu.
Arguidu deklara, depois sira fila ona maka ema baku fali lezadu, maibe se maka baku arguidu la hatene.
Rona tiha arguidu nain tolu, Tribunal adia ba loron seluk hodi rona deklarasaun husi lezadu sira.
Audensia julgamentu nee, prezide husi Juiz Kolektivu, Ivan Patrocenio, Arjentino Nunes, Juiz estajiadu nain ida, Ministeriu Publiku reprezenta husi Prokuradora, Remizia De Fatima, arguidu nain tolu hetan asistensia legal husi Advogadu Privadu, Joao.
Jornalista: Terezinha De Deus
Editora: Carme Ximenes
