DILI, STLTIMORLESTE.com – Funsionariu husi Ministeriu Edukasaun (ME) hamutuk rihun 4 sei tama ba idade reforma, husi numeru nee balun profesores no balun funsionariu administrasaun husi ministeriu refere.
Direitor Nasional Rekursu Umanu husi ME, João Amaral dehan, uluk iha 2024 mai too iha 2025 nee, tuir dadus neebe husi munisipiu mai iha ME hodi atualiza primeiru nee iha 3800 ba leten, maibe agora daudaun nee iha ona rihun 4, neebe dadus mai husi munisipiu nomos balun moras no balun idade reforma, agora daudaun iha ekipa boot ida kompostu husi KFP, INSS, ME, maibe ninia ekipa sira hamutuk ho INSS no KFP sempre tun ba terenu hodi observa direita iha terenu, dadus neebe ohin mensiona nee identifika iha tinan 2023 mai too agora.
“Tanba agora ita nian lei obrigatoriu nee, ita sei implementa iha dia 1 Janeiru 2026, agora daudaun nee sira balun neebe idade ona hakarak reforma no sira rasik mak halo rekerimentu, depois haruka mai iha ME liu husi Diresaun Rekursu Umanus, ita haruka fali ba iha ME, depois husi KFP sei halo kontajen hahu husi inisiu nee tama mai too iha data reforma, profesores reforma sira nee rekere ba iha munisipiu, bazeia ba sira nian rekerimentu nee haruka mai iha Rekursu Umanus ME nasional, depende ba rekerimentu, dala ruma lima bele too neen, depende ba profesor sira hatoo ba iha munisipiu,” dehan João ba STL iha nia knaar fatin Vila Verde, Tersa nee (13/05/2025).
João dehan, husi numeru rihun 4 nee kompostu husi profesor no funsionariu administrsaun nee iha ministeriu deit, maibe barak liu nee mai husi profesores. Profesores reforma nee kona-ba karta reforma ninia, sira nain la lori direita rekerimentu nee mai iha ME Nasional, maibe liu husi Edukasaun Munisipal.
Iha fatin seluk, Direitor Servisu Edukasaun Munisipiu Likisa, Julio da Silva dehan, tuir dadus rejista ida neebe iha profesor hamutuk 125 mak tama ona ba idade reformadu.
“Dadus neebe ita submete ona ba Ministeriu Edukasaun. Ita iha total profesor reformadu hamutuk 125. Sira seidauk hatama karta rekerimentu ba iha Ministeriu Edukasaun, maibe sira hein deit lei reforma obrigatoriu,” dehan nia.
Entretantu Diretor Servisu Edukasaun Munisipiu Ainaro, Patricio da Costa Magno hatete, profesor iha Ainaro mos hamutuk 129 mak tama ona ba idade reformadu.
“Iha Ainaro profesor hamutuk 129 mak tama ba idade reformadu kompostu husi mane 79, feto 50. Husi nivel prebeskolar nain 4, ensinu baziku 120, ensinu sekundariu jeral 5,” dehan nia.
Profesor neebe mate ona hamutuk 70. Mane 43, feto 32. Moras permanente 11, feto 3 no mane 8,” nia esplika.
(jac)
