DILI, STLTIMORLESTE.com – Funsionariu Palasiu Prezidensia hamutuk ho estudante sira hatoo felisitasaun ba Prezidente Republika (PR), Jose Ramos Horta neebe selebra tinan moris nian ba dala 76, iha 26 Dezembru tinan 2025.
Bainhira Prezidente Republika tama husi pontu entrada Palasiu Prezidensial, Xefe Kaza Sivil ho Kaza Militar hamutuk ho funsionariu nomos estudante sira hananu, hodi simu Prezidente Republika no hatoo votus parabens nomos feliz natal.
Iha biban nee Xefe Kaza Sivil Prezidensia Republika, Jezunia Maria Ferreira Gomes ba Jornalista sira, iha Palasiu Prezidensial, Nicolau Lobato, Bairo Pite, Segunda (29/12/2025) hatete, ida nee supreza ida ba Prezidente, tanba foin lalais iha 26 selebra nia aniversariu ba dala 76.
“Ida nee surpreza hela, tanba hanesan imi hatene bainhira Prezidente Republika selebrasaun tiha nia aniversariu liu ona, pesoal balun deit mak ba partisipa, ba iha selebrasaun nee, neebe ami organiza fali labarik ona sira, ho funsionariu sira neebe laiha oportunidade atu partisipa Prezidente Republika nia selebrasaun aniversariu nunee mai hananu, hanesan halo felisitasaun ida ba iha Prezidente Republika nee mak agora hein hela,” dehan Xefe Kasa Sivil nee.
Nunee mos Prezidente Republika, Jose Ramos Horta hatete, nuudar aman, avo no Prezidente Republika sente ondradu tebes, ba felisitasaun hotu neebe hatoo husi funsionariu nomos estudante sira.
Nia dehan, nuudar ema, nuudar aman, nuudar avo no nuudar Prezidente sente orgulhu bainhira Funsionariu husi Palasiu Prezidensial inklui labarik sira, hatoo votus parabens ba Prezidente neebe selebra aniversariu ba dala 76 iha palasiu.
“Tanba nee nuudar ema nuudar sidadaun nuudar Prezidente Republika hau buka sempre tau matan ba sira no fo domin ba sira, maibe laos ho domin deit maibe ho apoiu neebe fo apoiu mos parseria Governu, iha Governu ida hanesan maun Xanana kaer ke nia ho sensivel tebes nuudar kiak nuudar ema fraku konaba labarik sira,” dehan PR, Horta.
Entretantu partisipante neebe partisipa hodi hatoo felisitasaun votus parabens ba Prezidente dirize husi Xefe Kasa Sivil, nomos kaza Militar nomos protokulu, inklui funsionariu palasiu Prezidensial, estudante nomos media destakadu palasiu nia.
Jornalista: Emerenciana Pinto
Editora: Carme Ximenes
