DILI, STLTIMORLESTE.com – Organizasaun Intergovernamental g7+ hili ona Prezidente Republika (PR), Jose Ramos Horta nuudar enviadu espesial hodi halo mediasaun ba konflitu, ho desizaun nee PR Horta konkorda maibe sei komunika ho Primeiru Ministru, Kay Rala Xanana Gusmão.
Iha enkontru g7+, Organizasaun Intergovernamental g7+ hili ona Prezidente Timor Leste no Laureadu Nobel ba Pas, Jose Ramos Horta nuudar enviadu espesial hodi halo mediasaun ba konflitu sira iha mundu tomak.
Desizaun nee mosu durante Enkontru Ministerial ba dala VI grupu g7+ nian iha Díli, Timor Leste neebe nasaun membru sira konkorda hodi husu formalmente ba Sekretariu Jeral ONU nian, Antonio Guterres atu konsidera Ramos Horta ba knaar diplomatiku krusial nee.
Bainhira simu responsabilidade, Prezidente Ramos Horta afirma katak, nia aseita responsabilidade nee no sei koalia ho Maun Boot Xanana (refere ba Primeiru Ministru Xanana Gusmão) no depois ho Sekretariu Jeral ONU iha tempu badak, atu nunee ninia mandatu nuudar enviadu espesial g7+ nian bele iha baze mínimu ba susesu.
Prezidente sublina katak, nia presiza servisu makaas ho Sekretariu Jeral ONU, Uniaun Europeia no líder sira Uniaun Afrikana nian.
Enkontru nee konsidera ho g7+ nia aniversariu ba dala 15, rezulta mos iha mudansa sira iha lideransa ho Ministru Negosiu Estranjeiru Ilha Salomaun nian, Peter Shanel Agovaka, eleitu nuudar Prezidente g7+, hetan apoiu husi omologu sira hosi Republika Demokratika Kongo no Liberia nuudar Visi Prezidente sira.
Asembleia aprova mos dokumentasaun importante sira kona-ba rekonsiliasaun, jestaun rekursu natural sira, no jestaun finansa publika nian hodi hametin kooperasaun entre nia nasaun membru 20.
Ministru Negosiu Estranjeiru no Koperasaun Timor Leste nian, Bendito dos Santos Freitas, destaka susesu hosi enkontru ministerial, hodi nota katak Sekretariu Jeral ONU nian rekonese g7+ nia importansia neebe aumenta iha polítika global no iha diplomasia multilateral.
“Organizasaun nee kontinua foka ba promosaun dame no dialogu iha nasaun sira neebe afetadu hosi konflitu no frajil sira iha afrika, Azia, no Pasífiku,” dehan Ministru liu husi Komunikadu Neebe STL asesu husi media PR, Kuarta (16/04/2025).
(eme)
