DILI, STLTIMORLESTE.com – Ministeriu Edukasaun (ME) liu husi Gabinete Avaliasaun Lisensiamentu no Akreditasaun (GALA) halao monitorizaaun ba eskola internasional 10 neebe lokaliza iha kapital Dili, no fo karta notifikasaun ba eskola internasional sira nee ho razaun tanba la prienxe kriteria.
Koordenador Gabinete Avaliasaun Lisensiamentu no Akreditasaun (GALA), Antonio Tomas Maia hatoo kestaun nee ba jornalista STL iha edifisiu Ministeriu Edukasaun, Tersa nee (15/04/2025).
“Tinan nee ami halo monitoring ba eskola internasional 10, nee hahu husi nível pre eskolar too sekundariu, tanba liu husi monitoring nee mak ita halo analiza bazeia ba saida mak ita hetan husi nee ba, primeiru ita halo rekomendasaun ba sira, entaun depois de ita halo monitorizasaun, foin daudaun ita halo ona notifikasaun bazeia ba rezultadu neebe ita hetan husi nee ba, atu nunee sira konsidera saida mak ita hetan husi nee ba,” dehan nia.
Nia dehan, GALA fo notifika atu sira bele hadia saida mak rekomenda ba sira, GALA fo rekomendasaun iha aspeitu tolu, infraestrutura, pedolojia no jestaun eskolar, tanba iha nee ba buat lubuk ida mak identifika liu husi monitoring nee, depois hakerek karta ba sira.
“Injeral sira la kumpri intermus de infraestrutura, nee mak ita halo rekomendasaun fo notifikasaun ba sira, tanba bazeia ba notifikasaun nee saida deit mak sira tenke hadia, ita fo kedas deadline ba sira kada rekomendasaun iha ninia deadline, ida nee mak sira la kumpri ita foin bele halo asaun ameasa atu taka, tanba sira la kumpri ona deadline neebe iha,” nia haktuir.
Nia akresenta, monitoring nee GALA halao iha fulan Fevereiru no Marsu tinan nee, no identifika eskola sia hodi GALA fo notifikasaun para sira bele hadia saida mak hakerek iha notifikasaun refere, eskola estranjeiru internasional neebe monitorizadu hanesan Gràcia y Verdad, St. Paul Methodist, Pelican Grammar school, St.Jude Thadeus, St. Merry, St. Anthony, QSI, Singapore international School, Z & Z,TAIS.
(eme)
