DILI, STLTIMORLESTE.com – Tinan nee Gabinete Avaliasaun Lisensiamentu no Akreditasaun (GALA) implementa ona planu prioridade haat.
Lia hirak nee hatoo husi Kordenador Gabinete Avaliasaun Lisensiamentu no Akreditasaun (GALA), Antonio Tomas Maia ba jornalista STL iha nia knaar fatin Vila Verde, Tersa nee (06/05/2025).
“Planu prioridade haat ba tinan nee mak hanesan divulgasaun prosedimentu no kriteria lisensiamentu no akreditasaun, implementasaun prosedimentu no kriteria lisensiamentu no akreditasaun, monitorizasaun no avaliasaun periódika, dezenvolve padraun no kriteria ba akreditasaun eskola lokal ou eskola neebe mak uza kurikulu nasional, nunee mos halo monitoring ba eskola publiku no privadu sira nee iha tinan oin, maibe nee prioridade, implementasaun nee sei iha fazeadamente,” dehan nia.
Nia dehan, planu prioridade hirak neebe mak ohin mensiona implementa iha tinan nee no halo monitorizasaun ba eskola publiku no privadu sira nee halao iha tinan oin, agora sei foka liu ba eskola internasional.
Iha fatin seluk, Diretor Servisu Edukasaun Munisipiu Manatuto, Patricio da Cruz Quintao dehan, eskola internasional iha Manatuto nee balun hetan ona lisensa husi GALA no balun seidauk, tanba ME liu husi GALA mak iha kompetensia halo kontrolu ba eskola sira nee.
“Kona-ba fo lisensa ba ita nian eskola sira nee kompetensia husi Ministeriu Edukasaun liu husi GALA, tanba sira mak halo kontrolu ba ita nian eskola sira, nee duni oinsa mak ita nian eskola sira nee bele prienxe kriteria atu nunee halao prosesu ensinu aprendizajen ba ita nian estudantes sira,” dehan nia.
(jac)
