DILI, STLTIMORLESTE.com – Gabinete Avaliasaun Lisensiamentu no Akreditasaun (GALA) sempre iha linha koordenasaun neebe diak ho Diretor Servisu Edukasaun Munisipal sira.
Lia hirak nee hatoo husi Koordenador GALA, Antonio Tomas Maia ba STL iha nia knaar fatin Vila Verde, Tersa nee (13/05/2025).
“Ezatamente sempre iha linha koordenasaun, kualker servisu ita sempre iha linha koordenasaun ba malu, nee importante tebes-tebes, servisu hotu atu lao nee ita presiza iha linha koordenasaun ho parte relevante sira,” dehan nia.
Nunee mos Diretor Servisu Edukasaun Munisipiu Ainaro, Patricio da Costa Magno dehan, uluk ME liu husi GALA mai fo ona formasaun ba Diretor no Adjuntu Eskola sira, formasaun nee kona-ba eskola sira neebe atu hetan lisensiamentu ninia.
“Neebe ami hatama ona pedidu ba sira iha tinan 2024, atu nunee eskola hirak neebe mak paralelu nee hetan lisensa para hamriik mesak, nee duni ami nian linha koordenasaun ho ME liu husi GALA nee diak hela,” katak nia.
Nia hatutan, nuudar Diretor Edukasaun Munisipiu Ainaro, durante nee halo linha koordenasaun neebe diak ho parte GALA, liu-liu liga ba lisensiamentu no akreditasaun ba eskola sira neebe mak seidauk hetan lisensa, tanba ida nee kompetensia GALA mak fo lisensa no akreditasaun ba eskola sira nee.
Entretantu Direitor Servisu Edukasaun Munisipiu Manatuto, Patricio da Cruz Quintão dehan, kona-ba linha koordenasaun servisu ho GALA nee diak, haree ba iha lisensiamentu no akreditasaun ba eskola sira.
“GALA mak fo lisensa no akredita ba ita nian eskola sira, nee duni servisu hotu atu lao diak ita presiza koordena malu,” dehan nia.
(jac)
