DILI, STLTIMORLESTE.com – Gabinete Avaliasaun Lisensiamentu no Akreditasaun (GALA) nafatin halo linha koordenasaun ho Servisu Edukasaun Munisipal (SEM) no instituisaun relevante sira.
Haktuir Koordenador Gabinete Avaliasaun Lisensiamentu no Akreditasaun (GALA), Antonio Tomas Maia ba jornalista STL iha nia knaar fatin Vila Verde, Dili, Segunda nee (21/07/2025).
“Hau hanoin ami nafatin halo linha koordenasaun neebe mak diak ho ita nian Diretor Edukasaun Munisipal sira inklui ho ita nian diresaun relevante sira oinsa ami servisu hamutuk hodi haree ba eskola neebe eziste iha munisipiu nomos ita nian koordenasaun oinsa halo divulgasaun ba Diretor Edukasaun Munisipiu sira hotu, nee duni linha koordenasaun durante nee sempre lao diak hanesan baibain,” nia haktuir.
Nia dehan, GALA laos halo linha koordenasaun deit ho Diretor Edukasaun Munisipiu deit, maibe ho entidade relevante sira oinsa nafatin halo koordenasaun neebe mak diak ho sira, tanba linha koordenasaun servisu nee importante tebes-tebes.
Nunee mos Diretor Servisu Edukasaun Munisipiu Ainaro, Patricio da Costa Magno dehan, kona-ba eskola neebe seidauk hetan lisensa nee kompetensia husi ministériu nian liu husi GALA, tanba sira mak sei haree ba asuntu ida nee.
“Hau hanoin nuudar Diretor Edukasaun Munisipiu Ainaro, durante nee halo linha koordenasaun neebe diak ho parte GALA, liu-liu liga ba lisensiamentu no akreditasaun ba eskola sira neebe mak seidauk hetan lisensa, tanba ida nee kompetensia GALA mak fo lisensa no akreditasaun ba eskola sira nee.
Entretantu Diretor Servisu Edukasaun Munisipiu Manatuto, Patricio da Cruz Quintao dehan, kona-ba linha koordenasaun servisu ho GALA nee diak, haree ba iha lisensiamentu no akreditasaun ba eskola sira.
“GALA mak fo lisensa no akredita ba ita nian eskola sira, nee duni servisu hotu atu lao diak ita presiza kordena malu,” dehan nia.
(jac)
