DILI, STLTIMORLESTE.com – Gabinete Avaliasaun Lisensiamentu no Akreditasaun (GALA) fo ona karta notifikasaun ba eskola internasional neebe lokaliza iha munisipiu 6.
Haktuir Kordenador Gabinete Avaliasaun Lisensiamentu no Akreditasaun (GALA), Antonio Tomas Maia ba jornalista STL iha nia knaar fatin Vila Verde, Kuarta nee (02/07/2025).
“Ita nian dadus identifikasaun iha eskola neebe mak kategoria eskola internasional nee iha munisipiu 6, iha MunisÃpiu Lautem, Vikeke, Baukau, Manatuto, Manufahi no Ainaro, husi eskola neen nee ita ba halo ona monitorizasaun mos ita konklui tiha ona, husi eskola sira nee ita manda ona ita nian notifikasaun ba sira, saida deit mak sira presiza atu hadia, eskola internasional iha Munisipiu Dili ninia neebe antes nee ita fo ona notifikasaun ba sira,” nia dehan.
Nia dehan, notifika eskola internasional neen nee, GALA mos rekomenda lubuk ida, kuaze 35 pontu nunee, neebe mak fo ba eskola sira, atu nunee eskola sira nee bele haree no halo tuir saida mak GALA fo ba sira, iha nee ba fo kedas ho ninia durasaun katak, ida nee hadia iha fulan ida nee.
“Eskola internasional neen iha munisipiu nee nibel edukasaun pre eskolar no Ensinu Baziku, identifikasaun ba eskola internasional iha munisipiu too agora ita identifika mak neen deit, Dili nian nee antes ita fo ona karta notifikasaun ba sira, agora daudaun sira iha prosesu atu kumpri saida mak ita rekomenda ba sira iha notifikasaun nia laran, hodi sira bele hadia,” nia komenta.
Nunee mos Diretor Servisu Edukasaun Munisipiu Ainaro, Patricio da Costa Magno dehan, kona-ba eskola neebe seidauk hetan lisensa nee kompetensia husi Ministériu nian liu husi GALA, tanba sira mak sei haree ba asuntu ida nee.
“Hau hanoin nuudar Diretor Edukasaun Munisipiu Ainaro, durante nee halo linha koordenasaun neebe diak ho parte GALA, liu-liu liga ba lisensiamentu no akreditasaun ba eskola sira neebe mak seidauk hetan lisensa, tanba ida nee kompetensia GALA mak fo lisensa no akreditasaun ba eskola sira nee.
(jac)
