DILI, STLTIMORLESTE.com – Gabinete Avaliasaun Lisensiamentu no Akreditasaun (GALA) sei halo re-avaliasaun ba eskola internasional sira neebe eziste iha Munisipiu Dili inklui munisipiu sira seluk.
Koordenador GALA), Antonio Tomas Maia hatoo kestaun nee ba jornalista STL iha nia knaar fatin Vila Verde, Dili, Segunda nee (21/07/2025).
“Ita seidauk bele dehan, ita nian eskola internasional hira mak kumpri ona, tanba ita sei ba halo tan re-avaliasaun ba sira, depois sei haree direitamente sira kumpri pontus hirak neebe mak ita rekomenda ba sira nee, sira halo tuir ona ka lae, ida nee mak ita sei halo, agora ita prepara hela atu tun ba re-avalia fali ba sira. Iha eskola balun iha ona inisiativa, liga ho rekomendasaun neebe mak ita fo ba sira, liu-liu sira tenke hetan sertifikadu,” nia dehan.
Nia dehan, eskola rua ka tolu halo ona aprezentasaun ba sira, tanba sira halo koordenasaun ho Instituisaun INDICA atu fo formasaun ba sira kona-ba prevensaun labarik sira, sira iha hela prosesu formasaun neebe mak INDICA halo ba sira, maibe eskola balun mos husu lisensiamentu ba hanorin ninia, iha eskola balun hahu aprezenta ona hodi sira halo treinamentu ba profesores sira, atu nunee sira bele hetan sertifikadu lisensiamentu ba hanorin nian.
“Eskola balun halo ona kontaktu ho Instituisaun balun husi rai liur, atu klaru liu tan ita nian ekipa sei tun ba terenu, rekomendasaun saida mak sira halo ona, liga ba ita nian rekomendasaun sira kona-ba melhora infraetrutura ita haree ona, eskola balun fo ona informasaun katak sira komesa reabilitasaun, iha tempu badak nian laran ita sei halo re-avaliasaun ba eskola internasional, tanba ita sei forma hela ekipa, sei halo diskusaun oinsa nia mekanizmu tun ba halo re-avaliasaun nee, oinsa atu foti dadus, analiza, depois kompila, ida nee ita sei halo hela,” katak nia.
Nia akresenta, dala ruma sira halo re-avaliasaun la fo hatene ba sira no tun derepente deit hodi haree katak eskola sira nee iha seriedade atu kumpri rekomendasaun neebe mak GALA fo ona ba sira.
“Hanesan ita hotu hatene katak, eskola sira nee hetan lisensiamentu,.entaun ninia objetivu nee ita hodi haree, sira nee kumpri ona ita husu atu melhora diak liu tan no hirak neebe la kumpri ita husu para atu kontinua hadia aan,” nia esplika.
Nunee mos Diretor Servisu Edukasaun Munisipiu Manatuto, Patricio da Cruz Quintao dehan, Ministeriu Edukasaun liu husi GALA mak halo monitorizasaun ba eskola internasional sira nee, oinsa mak eskola sira nee bele prienxe rekezitus neebe iha.
(jac)
