DILI, STLTIMORLESTE.com – Gabinete Avaliasaun Lisensiamentu no Akreditasaun (GALA) seidauk simu pedidu ruma husi ema, kona-ba atu loke eskola.
Koordenador Gabinete Avaliasaun Lisensiamentu no Akreditasaun (GALA), Antonio Tomas Maia hatoo kestaun nee ba jornalista STL iha nia knaar fatin Vila Verde, Tersa nee (05/08/2025).
“Ita seidauk simu pedidu ruma kona-ba ema atu loke eskola, maibe GALA atu halo deit reavaliasaun ba ita nian eskola internasional neebe mak antes nee ita halo ona monitorizasaun, tantu iha Dili no iha Munisipiu sira, tanba atu loke eskola tenke prienxe kriteriu neebe mak GALA estabelese ona,” nia esplika.
Nunee mos Diretor Servisu Edukasaun Munisipiu Ainaro, Patricio da Costa Magno dehan, kona-ba eskola neebe seidauk hetan lisensa nee kompetensia husi Ministériu nian liu husi GALA, tanba sira mak sei haree ba asuntu ida nee.
“Hau hanoin nuudar Diretor Edukasaun Munisipiu Ainaro, durante nee halo linha koordenasaun neebe diak ho parte GALA, liu-liu liga ba lisensiamentu no akreditasaun ba eskola sira neebe mak seidauk hetan lisensa, tanba ida nee kompetensia GALA Mak fo lisensa no akreditasaun ba eskola sira nee.
Entretantu Diretor Servisu Edukasaun Munisipiu Manatuto, Patricio da Cruz Quintao dehan, kona-ba linna koordenasaun servisu ho GALA nee diak, haree ba iha lisensiamentu no akreditasaun ba eskola sira.
“GALA mak fo lisensa no akredita ba ita nian eskola sira, nee duni servisu hotu atu lao diak, ita presiza kordena malu,” dehan nia.
(jac)
