DILI, STLTIMORLESTE.com – Ministeriu Edukasaun (ME) liu husi Gabinete Avaliasaun Lisensiamentu no Akreditasaun (GALA) simu ona pedidu foun husi eskola internasional lima (5).
Lia hirak nee hatoo husi Kordenador Gabineti Avaliasaun Lisensiamentu no Akreditasaun (GALA), Antonio Tomas Maia ba STL iha nia knaar fatin, Sesta nee (08/11/2024).
“Ami simu pedidu husi ita nian eskola balu, sira nian prosesu ba hotu ona vestory, ita prosesu hotu ona no ba iha vestorya, ninia prosesu nee mak ida sira halo aplikasaun tuir padraun neebe mak iha, ita halo avaliasaun, depois ita halo pedidu ba iha inspesaun jeral hodi haree,” dehan nia.
Nia dehan, GALA simu pedidu husi eskola lima nee iha fulan Outubru foin lalais nee, ninia prosesu mak halo avaliasaun, eskola internasional lima neebe hatama pedidu nee mak tais internasional school, ensinu sekundariu jeral, Singapura internasional school, ba ensinu baziku primeiru no segundu siklu, st.marys internasional school, ba ensinu sekundariu, Z&Zinternasional school EPE/EB, heritage ESG.
“Bainhira sira nian pedidu mai ami sei halo analiza didiak, kuandu sira nian dokumentus hotu los, ami haruka ba inspesaun jeral atu halo verifikasaun prezensial iha sira nian eskola, neebe sira konklui hotu ona,” katak nia.
(jac)
