BOBONARO, STLTIMORLESTE.com – Primeiru Ministru (PM), Kay Rala Xanana Gusmão vizita urjente hodi observa direta rekursu gás naturál neebé identifikadu mosu iha aldeia Manu Aman, Suku Tapo-Memo, Postu Administrativu Maliana, Munisipiu Bobonaro.
Tuir Komunikadu neebe STL asesu Kuarta nee (27/11/2024) haktuir, komunidade identifika gás naturál iha Tersa dadersan, bainhira fura hela bee moos no solda hela kanu bee moos nian, derepente ahi lakan sai husi rai ku’ak liu-husi kanu lolon.
Tanba nee, komunidade ho inisiativa halo kontaktu hodi informa direta bá autoridade lokál no autoridade munisipál hodi informa mós bá Xefe Governu, Kay Rala Xanana Gusmão neebé tun kedan bá terrenu.
Tuir PM, Kay Rala Xanana Gusmão katak, “Hau husu komunidade ho autoridade Bobonaro atu koopera ho Ministériu Petróleu no Rekursu Minerais liu husi Institutu Jeosiénsia Timor Leste, I.P (IGTL, (IGTL, I.P) bele tun bá terrenu atu halo identifikasaun no estudu klean iha semana nee”, katak PM.
Nia dehan, rona dehan gas mosu nee mak mai haree direta, sei husu ekipa institu Jeosiensia TL bele mai halo identifikasaun klaru liu tan.
Ekipa tékniku sei halo investigasaun sientífika no kolheta dadus jeolojia atu bele hatene informasaun klaru kona bá gás, petróleu, rekursu minerál, bee no rekursu jeolójiku sira seluk.
Xefi Governu esplika bá populasaun Maliana, durante nee Governu liu husi ekipa IGTL I.P identifika rikusoin Timor nian kompostu husi fatuk, ahu, fatuk potásiu, sulfuriu, besi musan, dolemite, osan me’an, osan mutin, fosfatu, masin, gás naturál, jesu, kromite, clay ceramik, maganesite, bentonite arjila, maganesa, mármore, rai henek boot, infiltrasaun mina, kobra, volastonite no rikusoin seluk neebé ekipa jeolojia IPG sei buka nafatin iha kada munisípiu.
Iha fatin hanesan, Natalino Soares nudár trabalhador neebé fura bee moos informa, iha semana kotuk nia ho ekipa hetan kontaktu hosi uma nain, Lúcia Ferreira (50) atu fura bee moos, nunee sira hahú servisu iha semana kotuk fura bee moos uza kanu 4inch hodi monta ona kanu lolon tolu tun bá rai okos.
Durante fura bee moos, sira baku kanu bá rai okos hasoru problema hanesan rai toos, nunee sira kontinua baku no ikus mai hakoi ona kanu lolon tolu tún ba rai okos hodi hahú solda kanu, derrepente ahi ka gás naturál lakan sai hosi rai okos. Situasaun nee halo nia hakfodak no preokupa hodi bolu rai nain, Lucia Ferreira ho viziñu hodi haree akontesimentu nee.
Ho akontesimentu nee, rai nain no autoridade sira kontaktu kedan Prezidente Autoridade Munisípiu Bobonaro, Alexandre Pires no Xefe Suku Tato-Memo, Joaquim Batista dos Santos hodi kontaktu Komandante PNTL Munisípiu Bobonaro, Superintendente Xefe Polísia, Agostinho Gomes da Silva no autoridade Bombeiros hodi halao indentifikasaun no hapara provizóriu atividade nee.
Nunee mós Prezidente Autoridade Munisípiu Bobonaro, husu bá komunidade atu mantein kalma hodi koopera ho ekipa Governu nian neebé sei halo peskiza klean.
Autoridade munisipál nee, konsidera vizita Xefe Governu nian importante hodi motiva ekipa Institutu Petróliu no Jeolojia-Institutu Públiku atu tun direta iha terrenu hodi halo peskiza klean.
Komandu PNTL mós dada kedan polisi line hodi bandu komunidade kontinua fura bee moos too ekipa Governu halo identifikasaun.
(gui)
