DILI, STLTIMORLESTE.com – Ema ho Defisiensia (EhD) neebe trata asuntu Unidade Servisu Asuntu ba Inkluzaun Sosial (USAIS) iha Orgaun Prezidente Republika (PR), Gaspar Afonco husu ba lider rezistensia sira atu rona malu, bainhira koalia asuntu nasaun no povu Timor Leste (TL) nia vida.
“Ita husu ba lider rezistensia sira atu haburas unidade nasional, liu-liu oinsa atu rona malu, bainhira halo debates ka foti desizaun ruma ba asuntu estadu no povu Timor Leste nian,” dehan ativista EhD iha Timor Leste, Gaspar Afonco ba STL, iha Kaikoli, Dili, Sesta (22/11/2024).
Desizaun politika saida deit tuir nia kuandu lao ba oin presiza unifikasaun politika ba lider rezistensia sira, tanba sira mak sai pontu importante ba asuntu nasaun no povu nian, tanba hanesan lider rezistensia labele hatudu hahalok aat ba jerasaun foun sira atu halo tuir, maibe hatudu ezemplaridade politika neebe dignu ba jerasaun foun atu lao tuir.
Maibe kuandu hatudu ona hahalok neebe la diak ba jerasaun, mak istoria nee sei avansa beibeik ba oin, nunee lider rezistensia sira, hanesan Atual PrimeiruMinistru (PM), Kay Rala Xanana Gusmão, Sekretariu Jeral FRETILIN, Mari Alkatiri, Eis PM, Tauk Matan Ruak, Eis PR, Fransisco Guterres Lú Olo, segundu Jerasaun CCF, Lere anan Timor, tenke fo ulun ba malu, hanoin hamutuk, lian ida ba dezenvolvimentu nasaun Timor Leste nian.
Lider rezistensia sira tenke hatudu ezemplaridade oinsa harii unidade pas no estabilidade ba malu, katak ida nee mak sai identidade importante neebe jerasaun foun sira tenke lao tuir, nunee presiza rona malu, foti desizaun hamutuk, dezenvolve no rezolve preokupasaun estadu no povu nia aspirasaun sira hotu.
Tanba povu hakarak moris livre husi terus no susar, nunee presiza hamutuk hodi dezenvolve preokupasaun sira neebe povu enfrenta, katak hamutuk hodi liberta povu ba moris sobrevivensia no bem-estar.
Iha parte seluk, Jerasaun Patriota, Ernesto da Costa Trindade afirma, dezenvolvimentu nasaun Timor Leste atu lao ba oin ka kotuk, depende desizaun lider rezistensia nian, tanba sira mak sai ponte ida atu lori povu halo movimentasaun diak iha rai laran.
Tanba preokupasaun nasaun nian laos ema unipesoal ema ida ka rua mak sai autor ba desizaun refere, maibe hanesan lider rezistensia no foun, tenke servisu hamutuk, rona malu, ho lian ida, lao hamutuk halo dezenvolvimentu ba povu Timor Leste.
Entretantu antes nee Jeneral reformadu, Lere Anan Timur, apela ba lider istoriku sira atu tau aan hanesan aman ba nasaun, no labele defende deit partidu ida no ema ida.
(EST 1)
