BAUKAU, STLTIMORLESTE.com – Gabinete Apoiu Sosiedade Sivil (GASS) observa atividade mobile klinika neebe durante nee Fundasaun Klinika Lafaek Diak (FKDL) implementa iha Munisipiu Baukau.
Koordenador Gabinete Apoiu Sosiedade Sivil, Joaquim da Costa Freitas hateten, Fundasaun Klinika Lafaek Diak parseiru Governu nian neebe apoiu ona servisu konsulta ba komunidade sira iha area remotas durante tinan 2, tanba nee Gabinete Apoiu Sosiedade Sivil iha obrigasaun halo monitorizasaun, tanba atividade Lafaek Diak implementa hanesan halo Klinika Movel iha area remotas sira, tanba hetan apoiu fundus husi Governu.
“Ami haree ho matan funsionamentu Lafaek Diak lao duni bele garante evidensia sira neebe hetan sai relatoriu final ba nia servisu sira durante iha apoiu nee, mais importante liu mak bele hatene kedas kona-ba rezultadu sira neebe Lafaek Diak hetan iha atendimentu durante nee,” hateten Joaquim ba jornalista sira, iha Triloka, Sesta (05/09/2025).
Koordenador nee argumentu, orsamentu neebe iha tinan 2025 Governu apoiu ba klinika refere ho montante kiik, maibe bele halo servisu boot liu husi atendimentu saude besik ba komunidade sira iha area remotas.
Gabinete Apoiu Sosiedade Sivil mos planu sei konvida Klinika Lafaek Diak hodi aprezenta rezultadu final husi Klinika Movel nian iha Palasiu Governu nunee bele tetu hamutuk ba futuru nian, nunee Gabinete Apoiu Sosiedade Sivil bele foti dezisaun ba proposta husi Klinika refere iha tempu tuir mai neebe haree liu ba rezultadu servisu iha terenu fo atendimentu saude ba komunidade sira neebe prezisa iha area remotas.
“Ba oin depende avalisaun, tanba laos Lafaek diak mak hatete hakarak kontinua parseiru, mais atu hateten kontinua parseiru komunidade tarjetu sira neebe mak sente Lafaek Diak nia atendimentu nee, neebe ohin ami mai halo avaliasaun iha parte seluk sei konvida diretor ba Palasiu halo aprezensaun,” nia katak
Koordenador nee mos dehan, aliende Klinika Lafaek aprezenta relatoriu servisu iha Palasiu Governu, iha ekipa ida sei halo vizitasaun ba Suku sira neebe antes nee Klinika Lafaek Diak implementa programa Mobile Klinika hodi intervista komunidade sira neebe antes nee hetan konsulta saude husi ekipa Klinika Lafaek Diak hodi tetu ba apoiu kontinuasaun nian iha 2026.
Nunee mos Diretor Lafaek Diak, Constantino Pinto hatete, implementasaun programa Klinika Movel iha tinan nee ba Suku 11 ho fatin konsulta 16 neebe konsidera remotas tebes, tanba dook husi Postu Saude neebe ekipa atende ho total populasaun hamutuk rihun 456 durante fulan neen ikus.
“Numeru nee sira hela dook husi Sentru Saude no Postu Saude iha area remotas, tanba asinadu ho Ministeriu Saude haruka ami ba area remotas, maibe pedidu asina husi Xefi Suku no Xefe Aldeia katak Povu prezisa duni hafoin ami ba,” hatete Constantino.
Diretor nee esplika, Klinika Movel neebe durante nee implanta hetan fundus GASS no orientasaun Servisu husi Ministeriu Saude neebe haruka ekipa Klinika Lafaek Diak ba area remotas hodi fo serteza ba komunidade sira iha atendimentu saude nian.
Nia sublina, serteja konsulta saude neebe ekipa halo laos dala ida deit, maibe kada fulan kobre Suku 11 na fatin konsulta 16 hodi garantia saude ba komunidade sira tuir Ministeriu Saude haruka, tanba Klinika Lafaek Diak nuudar liman ain Ministeriu Saude nian iha baze hodi fo asistensia ba komunidade sira iha area remotas.
“Dala ruma ita nia povu dehan Ministeriu Saude la mai, lae, Ministeriu Saude mak nain ba saude orienta ami lao, baibain povu koalia Ministeriu Saude nia la diak, maibe ami presta servisu, tanba Ministeriu apoiu ami diak loos,” Constantino argumentu
Nia fundamenta, aleinde fundus husi GASS Lafaek Diak mos hetan apoiu ekipamentus saude nian hanesan ai-moruk no seluk tan neebe durante nee fo konsulta gratuitu ba komunidade sira iha Suku 11 ho fatin konsulta 16.
Nunee kona-ba relatoriu servisu nian sei relata ba Parlamentu Nasional no entidades relevante seluk tan, tanba durante nee parte deputadu sira mos halao hela fiskalizasaun kona-ba konsulta gratuitu refere.
“Hau propoin ba Parlamentu mak nee ami nia problema mak kapital ho fasilidade, ami hatoo mak ai-moruk, tanba ai-moruk neebe iha nee too deit ona fulan 3, maibe ami sei lao,” katak Constantino.
Entertantu iha tinan 2025 nee Fundasaun Klinika Lafaek Diak hetan apoiu fundu husi Gabinete Apoiu Sosiedade Sivil ho valor rihuh US$ 30 ba objetivu atu responde ho efetivu ba servisu saude ba komunidade nian neebe implementa liu husi Klinika Movel iha Suku Bahu, Tirlolo, Buruma, Tequinomata, Samalari, Uailili, Ostico, Gariwai, Ossoala, Vemasse inklui Suku Cairui.
Jornalista: Tomas Reis
Editora: Carme Ximenes
