DILI, STLTIMORLESTE.com – Bainhira gasta Orsamentu Jeral Estadu (OJE) tenke ba nesesidade povu nian, laos uza fali ba eventu boot sira hanesan serimonia nasional.
“Ita tenke matenek hodi gasta povu nia osan, uza povu nia osan hodi hadia ba interese sira neebe povu Timoroan rasik hakarak, laos uza deit ba eventu nasional sira, povu balun mak sente no povu balun seluk nunka sente,” dehan Akademiku husi Universidade Nasional Timor Lorosa’e (UNTL), area Siensia Politika, Bartolomeu Antonio Pinto ba jornalista sira, iha Kaikoli, Dili, Segunda (22/10/3024).
Tanba tuir nia, aprovasaun orsamentu iha 2025 nian bilhaun US$ 2,6 nee orsamentu ida neebe montante boot, no foin mak Governu nee aprova.
Ho nunee husu atu utiliza OJE refere ho dignu, tuir nesesidade povu nian, haree komdisaun sira neebe durante nee povu ezije atu hadia, hanesan estrada, bee moos, setor infraestrutura sira seluk neebe daudaun nee sei aat hela, tanba orsamentu refere nee povu juta ida resin nian, laos ema grupu ka individu nian.
“Ita haree orsamentu neebe aprova iha tinan kontuk 2023 nian, gasta hira ona, restu hira mak tau fila fali ba kofre estadu nian, durante nee povu la sente, sente mak ho projetu ajudikasaun direta sira, maibe kualidade ba povu laiha,” nia sublina.
Iha parte ketak, ativista husi Universidade Oriental Timor Lorosa’e (UNITAL), Gabriel de Jesus hatete, orsamentu neebe hetan aprovasaun husi orgaun Parlamentu Nasional (PN) husu ba Orgaun Prezidente Republika atu tetu ho diak, hafoin promulga ou veta.
Tanba orsamentu nee ho montante boot tebes, aprovasaun ba OJE nee mak promulga duni, husu atu halo investimentu ba setor produtivu sira iha rai laran, hanesan agrikultura, turizmu no setor sira neebe sai pontu interese ba dezenvolvimentu nasional nian, tenke dezenvolve ho diak.
“Ita bainhira dezenvolve ona setor turismu sira iha rai laran mak sei fasil ba Timoroan sira atu halo mudansa ba moris, hetan servisu empregu neebe bele hadia nesesidade moris, minimiza numeru dezempregu iha rai laran,” dehan nia.
(gui)
