DILI, STLTIMORLESTE.com – Atuasaun neebe Guarda Jestaun Merkadu iha Munisipiu Dili (GJMD) ho Sekretariu Estadu Asuntu Toponomia no Organizasaun Urbana (SEATOU) halao, lori halai Vitima Zeka Bareto Baros nia osan ho montante US$ 170.
Tanba haree husi atuasaun jerente merkadu ho SEATOU uza sistema brutalizmu no agresaun fiziku hasoru komunidade ka povu kiik sira, bainhira halao hela atividade negosiu, hanesan faan sasan, liu-liu modo, repolhu, brinjela, tomate no seluk tan, too ikus foti hotu osan ho montante US$ 170, nee aktu ilegal neebe uza hodi hasoru negosiante Timoroan sira.
“Ita haree husi atuasaun nee, ekipa Jestaun merkadu hamutuk ho trabalhador husi Sekretariu Estadu Asuntu Toponomia no Organizasaun Urbana (SEATOU), atu hasai komunidade sira neebe faan sasan iha estrada ibun, liu-liu iha Kampu Baru nian, maibe laos ba ho seguransa maibe ba ho problema destroisaun, too negosiante Jeka lakon nia osan no hetan tiru husi okunum Polisia balun,” dehan Posta Voz, José Martins kodiku (Teki Liras) ba jornalista sira iha Bidau Toko Baru, Kinta nee (24/10/2024).
Asaun brutalizmu ida nee tuir nia hahalok ida neebe la diak ba povu kiik sira, liu-liu negosiante sira, bainhira sira faan nia sasan iha estrada ninin sira, ekipa husi jestaun merkadu sira mai sobu deit, too osan komunidade nia mos lori halai hotu too lakon.
Tanba nee, husi atuasaun neebe Jestaun Merkadu hamutuk ho SEATOU no seguransa polisial balun, objetivu atu mai asegura laos atu tiru, tanba tiru malu uluk mak ohin ukun rasik aan, tiru ida ohin nee asaun brutalidade neebe uza hodi limita povu nia direitu.
“Ita observa katak, horiseik asaun neebe ekipa jestaun merkadu ho ekipa SEATOU halo, rezulta negosiante lakon nia osan ho montante US$ 170, no lekon mos nia ran turuk ida, tanba hetan tiru husi membru polisial balun, too liman karuk tohar, tanba nee husu ba parte governu atu haree didiak,” dehan nia.
Nia dehan, vitima neebe hetan tiru husi membru polisial ho naran, Zeka Bareto Baros, neebe ho kondisaun liman karuk tohar, daudaun nee halo hela yratamentu iha Hospital Nasional Guido Valadares (HNGV) iha munisipiu Dili.
Entretantu vitima, Zeka Bareto Baros hatete, hanesan negosiante ida sentre triste tebes ba atuasaun neebe governu uza, hodi hanesan povu kiik nia direitu ba faan ka halo negosiu.
Tanba ekipa husi jestaun merkadu hamutuk ho SEATOU, ba ho besikanu kedas, sobu rahun sasan no produtu sira neebe faan, too lori halai osan US$ 170, la hatene katak João/Maria mak foti, maibe klaru katak Jestaun merkadu sira mak lori halai, tanba sira mak mai sobu.
(EST 1)
