DILI, STLTIMORLESTE.com – Golgota Mall neebe antes tama bá loron natal no tinan foun 2026 nakonu ho vizitantes husi dader too fali iha loraik, maibe depois loron boot rua nee liu tiha, daudaun fatin nee menus komprador no situasaun nee fila fali hanesan tempu baibain.
Golgota Mall nuudar sentru merkadu ida iha Timor Leste, neebe lokaliza iha Dili, Golgota, Suku Komoro nian. Bainhira tama bá loron boot hanesan natal no tinan foun, nunee mos iha loron paskua fatin nee atrai tebes vizitantes barak mak mai vizita fatin nee hodi haree no sosa sasan oioin neebe faan iha fatin refere.
Tuir Jasinta neebe hein sasan iha Golgota Mall dehan, tama ba loron baibain hanesan nee ema ladun mai sosa. Ema mai sosa duni, maibe la hanesan ho loron boot neebe hanesan temi nee.
Nia katak, Golgota Mall nee ho nia kuartu no numeru idak-idak. Sasan neebe faan iha nee mak hanesan hena, ropa husi labarik too ema boot mak faru, vistidu, kalsa, sapatu, ropa batik, jas no seluk tan.
“Loron baibain hanesan nee ema vizita nee ladun barak, so loron boot sira mak ema mai sosa nee makas. Nee laos deit iha Dili laran maibe ema husi Munisipiu sira nee mai hotu,” dehan nia bá STL iha Golgota, Kinta (08/ 01/2026).
Nia hatutan, bele dehan fatin sira hanesan nee rame makas neemak iha loron boot hanesan natal, tinan foun no paskoa. Tama fali bá loron baibain nee vizitante sira menus.
Reportajen: Domingas Gomes
