DILI, STLTIMORLESTE.com – Relasiona ho politika IX Governu liu husi Sekretariu Estadu Asuntu Toponomia no Organizasaun Urbana (SEATOU) halo eviksaun ba komunidade iha Suku Akadiru-hun no Bidau-Santa, daudaun nee komunidade iha area refere seidauk hetan indemnizasaun.
“Ita nia komunidade sira neebe sai vitima ba politika eviksaun iha Suku Akadiru-hun no Bidau-Santa nian, uma kain 197 mak daudaun nee seidauk hetan indemnizasaun, tanba nee husu ba Governu atu kria kondisaun neebe dignu ba komunidade atu sustenata moris,” dehan Xefi Suku Akadiru-hun, Juvinal da Conceição ba STL iha Sede Suku Akadiru-hun, Dili, Segunda (02/12/2024).
Tuir Xefi suku nee, hanesan autoridade lokal apresia no koopera tebes ba programa no politika Governu hodi halo dezenvolvimentu iha nasaun nee, maibe Governu rasik mos tenke hanoin preokupasaun komunidade nian katak, komunidade neebe sai vitima ba politika eviksaun too agora seidauk hetan nia direitu.
Komunidade uma kain 197 durante nee mai husi autoridade suku, katak dalan oinsa bele hetan sira nia diretu ka indemnizasaun husi Governu, bainhira los mak Governu bele kria kondisaun ba sira, atu hela tan fatin neebe seguru ho uma neebe dignu ba sira.
Tanba nee, nuudar autoridade lokal sempre levanta preokupasaun nee ba Governu, maibe too agora Governu rasik laiha resposta efetivu, entaun komunidade iha suku Akadiru-hun no Bidau-Santa too agora la hetan sira nia direitu.
Iha parte seluk, komunidade vitima ba politika governu ba eviksaun iha Bidau-Santa, Arcanjo Filipe Soares afirma, durante liu husi politika IX Governu ba evikasaun iha Suku Akadiru-hun, Bidau-Santa hatene hasai deit komunidade iha nia rezidensia, maibe la hatene atu fo korespondensia ba komunidade nia kondisaun sira.
Tanba komunidade neebe hetan afetasaun ba eviksaun iha Bidau-Santa hamutuk uma kain 197 too agora seidauk halo indemnizasaun no kria estabilidade politika ruma ba komunidade.
(EST 1)
