DILI, STLTIMORLESTE.com – Governador Banku Sentral Timor Leste (BCTL – sigla português), Helder Lopes entrega planu estratejiku dezenvolvimentu setor finanseiru ba Prezidente Republika (PR), Jose Ramos Horta.
Bainhira remata hasoru malu, Governador BCTL, Helder Lopes ba jornalista sira iha palasiu Prezidensial Nicolau Lobato, Bairo Pite, Dili, Segunda (10/03/2025) hatete, mai hasoru Prezidente hodi aktualiza servisu BCTL nia, alende nee entrega mos planu estratejiku dezenvolvimentu setor finanseiru ba Prezidente Republika.
“Mai hasoru Prezidente Republika hodi aktualiza ba Prezidente sobre asuntu balu, primeiru mak aproveita okaziaun hasoru Prezidente Republika enome BCTL entrega planu estratejiku ba dezenvolvimentu setor finanseiru iha Timor Leste ba dekada oin mai husi 2025 too 2035 ba exelensia Prezidente Republika,” katak Governador.
Governador BCTL dehan, iha planu estratejiku nee iha komponente fundamental 4, ida mak industria finanseiru disponibliza rekursu finanseiru ba ekonomia liu husi tantu kreditu nomos mekanizmu seluk. Ida fali mak atu promove sistema pagamentu nasional liu-liu oinsa para sistema pagamentu nasional iha Timor Leste orientadu ba dijitalizasaun, ida seluk mak oinsa atu ajuda ema empreza hodi asesu ba servisu finanseiru tantu kreditu depozitu hodi promove inkluzaun finanseria, ikus liu iha planu estratejiku koalia sobre oinsa banku sentral servisu hamutuk ho entidade relevante sira atu promove ou atu moderniza industria finanseria.
“Bainhira ita koalia sobre modernizasaun iha industria finanseria iha elementu fundamental rua mak infraestrutura nomos kuadru legais, neebe bainhira ida nee ita establese, espera ke servisu finanseiru balu hanesan merkadu finanseiru ita bele hahu prepara ona oinsa iha futuru bele estabelese ita nia rai nomos dividas publika,” dehan nia.
Nia dehan, ida nee oinsa mak bele halo preparasaun para iha futuru bele aplika implementa iha Timor Leste, ida nee planu primeiru neebe liga ho planu estratejiku dezenvolvimentu setor finanseru iha Timor Leste.
Nia dehan, kestaun segundu neebe nia atualiza ba Prezidente Republika mak sobre fundu minarai depois Prezidente viajen husi Vietnam iha hanoin balu neebe mak partilha ho Governador.
(eme)
