BAUKAU, STLTIMORLESTE.com – Governu liu husi Ministeriu Solidariedade Sosial no Inkluzaun (MSSI) apoiu ai-haan komplementar ba komunidade hamutuk 594 iha Postu Administrativu Kelikai Antigu, Munisipiu Baukau.
Apoiu refere realiza iha loron 27 Maiu tinan nee, neebe ekipa MSSI lidera husi Ministra Verônica das Dores distribui ai-haan komplementar ba komunidade sira iha Postu Kelikai Antigu, kompostu Suku Afaça, Namanei no Guruça.
Husi Suku tolu refere, Suku Afaça rejistu benefisiariu 181, Namanei 215 no Guruça 198 neebe moris ho kondisaun kategoria vulneravel, idozu, abandonados, erois vivos no Ema ho Difisiensia.
“Nee programa Ministeriu neebe sempre tau atensaun ba povu vulneravel sira iha area rurais, tanba nee husi Kelikai Antigu ita relata ba Ministra kona-ba dadus vuneravilidade pur-volta 500 ital sai benefisiariu ba programa ai-haan komplementar nee,” hateten Administrador Postu Kelikai Antigu, Fransisco Matias Gusmão “Junior” ba STL iha Vila Nova Baukau, Kinta (29/05/2025).
Nia esplika, programa ai-haan komplementar neebe Governu liu husi MSSI apoiu ba benefisiariu sira mak hanesan fos, mina tein, koto, susuben, biskuat no seluk tan.
Autoridade Postu Kelikai Antigu nee espresa sentimentu agradese ba Governu, tanba bele inisia planu apoiu ai-haan ba komunidade vuneravel no konsdisaun seluk tan, maibe seidauk natoon, tanba komunidade iha Kelikai Antigu barak moris kondisaun hanesan, maibe seidauk hetan apoiu hanesan.
Mezmu nunee, maibe Autoridade nee nafatin agradese, tanba programa refere Ministeriu katak sei implementa iha kada Suku ba segundu faze, bainhira implementa primeiru faze iha kada Postu Administrativu remata.
“Segundu faze nian ita halo hela preparasaun ba dadus para ba segundu via nee ita manda ba MSSI distribui ba kada Suku direita,” hateten Fransisco Matias Gusmão “Junior”.
Autoridade Postu nee katak, ba segundu faze nian parte Autoridade Postu liu husi ekipa Suku kontinua halo preparasaun ba dadus komunidade moris ho kondisaun kategoria vulneravel, idozu, abandonados, erois vivos no Ema ho Defisiensia, tuir planu sei relata ba MSSI hodi implementa programa hanesan iha nivel Suku ba segundu faze, nunee bele responde ba seluk neebe la hetan apoiu iha faze primeiru neebe implementa iha nivel postu.
(tom)
