BAUKAU, STLTIMORLESTE.com – Governu liu husi Autoridade Protesaun Sivil (APC – sigla português) apoiu material rekuperasaun ba vitima dezastre naturais hamutuk uma kain 119 iha Munisipiu Baukau.
Diretor Ezekutivu APC, Gui Xavio Vicente esplika, loron 16 Maiu 2025 APC hamutuk ho Autoridade Munisipiu ofisialmente distribui material rekuperasaun ba vitima dezastre naturais iha Baukau, neebe afetadu iha tinan 2023 no 2024 tuir dadus neebe APC Munisipiu relata ba Nasional.
“Distribuisaun ida nee ba vitima afetadu 2024 nomos 2023 iha Postu neen benefisiariu hamutuk 119, orsamentu neebe ita apoiu hamutuk US$ 74,700.00,” informa Gui ba jornalista sira hafoin serimonia distribuisaun iha Vila Nova Baukau, Sesta (16/05/2025).
Nia sublina, husi uma kain 119, rejistu iha Postu Administrativu Baukau Vila katergoria estragus natoon 3 no estragus kmaan 16, Baguia natoon 2, Laga natoon 2 no kmaan 9, Kelikai natoon 3 no kmaan 57, Vemasi estragus total 1, natoon 4 no kmaan 5, aliende mos Postu Venilale rejistu katergoria estragus total 2 no estragus kmaan 15.
Nia fundamenta, benefisiariu hirak nee Governu fo apoiu material rekuperasaun kona-ba material konstrusaun nian hanesan kalen uma, baja, sementi, metru, kanuru badaen kiik-boot, balde no seluk tan. Aleinde mos apoiu orsamentu mao de obra no orsamentu transporte ba benefisiariu sira, maibe fo apoiu la hanesan, tanba bazeia ba katergoria uma estragus neebe APC rejistu ona.
“Uma estragus aat total nia orsamentu ba pesoal ida US$ 850.00 ho nia kustu transporte US$ 150.00, naton US$ 600.00 kustu transporte US$ 150.00, estragus kmaan US$ 450.00 kustu transporte US$ 150.00,” Gui akresenta.
Benefisiariu Simão dos Reis Freitas husi Suku Lakuliu, Postu Kelikai, agradese ba Governu, tanba iha tinan liu ba uma hela fatin hetan estragus husi anin boot, maibe daudaun fo ona apoiu material rekuperasaun atu konstrui hikas uma hela fatin.
“Sente kontente tanba ami bele hetan tulun husi Governu sira bele hakman netik sofrimentu neebe durante nee ami enfrenta,” Simão espresa.
Autoridade Munisipiu Baukau liu husi Sekretaria Munisipal Asuntu Sosial, Maria Celestina Viegas husu benefisiariu sira atu responsabilidade utiliza material rekuperasaun neebe Governu apoiu liu husi konstrui hikas uma hela fatin hodi fo mahon ba membru familia.
“Inan Aman simu sasan sira nee uza ho responsabilidade hadia fila fali fatin bele mahon atu nunee sai ema neebe hadomi estadu liu husi buat neebe oferese, tanba nee hadia fali uma neebe aat ona,” Maria sujere.
Entretantu durante prosesu distribuisaun material rekuperasaun iha Baukau, parte APC aviza ba benefisiariu sira katak, bandu faan material rekuperasaun sira, bandu halo uma iha area risku ba dezastre naturais hanesan iha foho lolon, mota ninin no tasi ninin.
(tom)
