DILI, STLTIMORLESTE.com – Konselhu Ministru aprova ona projetu Dekretu Lei neebe aprezenta husi Primeiru Ministru, ho objetivu atu estabelese Bazes ba Ordenamentu no Jestaun Espasu Maritimu Nasional nian, ho kriasaun enkuadramentu juridiku ida ba organizasaun integrada no sustentavel territoriu maritimu Timor Leste nian.
“Diploma nee define espasu marítimu nasional no konsagra prinsipiu sira hanesan abordajen ekosistema, jestaun integrada no artikulasaun entre tasi no rai, hodi garante kompatibilidade entre uzu no atividade oin-oin,” haktuir nota komunikadu imprensa neebe STL asesu husi media Ministru Prezidensia Konselhu Ministru, Sesta (20/02/2026).
Projetu dekretu lei nee prevee mos elaborasaun instrumentus ordenamentu nian, hanesan planu situasaun no planu alokasaun, no mos regulamentu kona-ba uzu privadu espasu marítimu nian liu husi konsesaun, lisensa ka autorizasaun sira.
Ho medida ida nee, Governu reforsa baze legal neebe nesesariu atu promove ekonomia tasi nian, garante protesaun ba ambiente tasi, no garante dezenvolvimentu ida neebe ekilibradu no sustentavel ba espasu marítimu nasional.
(alb)
