DILI, STLTIMORLESTE.com – Iha loron Kuarta (22/10/2025) Governu aprova ona dekretu lei ida hodi estabelese linha solidariedade, hodi haree ba kazu violensia bazeia ba jeneru no violensia hasoru labarik no joven sira.
“Neebe hau fo hatene ba Prezidente katak horiseik iha Konselhu Ministru hasai dekretu lei ida, neebe kria numeru numeru telephone 115 atu fo apoiu atendimentu ba pedidu husi sese deit mak hakarak informa kona-ba violensia kontra jeneru ka iha uma laran, violensia domestika ka violensia seksual ho violensia kontra labarik sira,” dehan PM, Xanana ba jornalista sira, bainhira remata halao enkontru ho Prezidente Republika, iha Palasiu Prezidensial, Nicolau Lobato, Bairo Pite, Dili, Kinta (23/10/2025).
Governu tuir Eis Prezidente Republika atual Primeiru Ministru iha Governu da-9 nee katak, kria ona Konselhu ida iha neeba para atende, tanba problema barak no iha uma mahon balu, Primeiru Ministru mak lori netik apoiu ruma ba haree.
“Hau mak lori netik buat ruma ba liu tiha fulan tolu ba fali haree sira neebe hau haree fulan 3 kotuk ba nee sira fila ona ba uma, ema foun fali mak iha neeba, labarik kiik sira kous ona oan sira isin boot oituan ona hetan violensia neebe presiza duni kria sistema ida, nunee se deit mak hatene hatoo ba para fo apoiu tanba problema nee mosu bebeik,” dehan Xefe Governu.
Xefe Governu hatete, dekretu lei nee sei lori ma Prezidente Republika hodi asina, nunee bele redus kazu violensia domestika hasoru feto no labarik sira iha rai laran.
Projetu Dekretu-Lei, aprezenta husi Ceu Brites, Visi Ministru Solidariedade Sosial no Inkluzaun, hodi Estabelese Linha Solidariedade hodi haree ba kazu violensia bazeia ba jeneru no violensia hasoru labarik no joven sira.
Lina Solidariedade mak servisu gratuita, konfidensial, oras 24 neebe dezena atu fornese kanal resposta imediata ba situasaun violensia, hodi garante vítima sira asesu ba apoiu psikolojiku, sosial, legal, no institusional.
Mekanizmu foun nee sei jere hosi Ministeriu Solidariedade Sosial no Inkluzaun no sei iha hanesan parseiru prinsipal ministeriu oioin, autoridade munisípiu sira, no parseiru dezenvolvimentu sira, ho objetivu atu hametin protesaun ba vítima no koordenasaun entre servisu emerjensia, seguransa, saude, no justisa.
Numeru uniku sei asesível hosi kualker rede nasional telekomunikasaun nian, hodi permite eskalasaun lalais hosi kazu sira no ativasaun imediata hsi rekursu sira resposta nian iha situasaun sira ho risku iminente.
Jornalista: Emerenciana Pinto
Editora: Carme Ximenes
