DILI, STLTIMORLESTE.com – Governu liu husi reniaun Konselhu Ministru aprova projetu rezolusaun governu, neebe aprezenta husi Ministru Administrasaun Estatal, Tomás do Rosário Cabral, ba ezekusaun estratejia desentralizasaun administrativa no instalasaun orgaun reprezentativu poder lokal 2025-2028 nian.
Medida ida nee ho objetivu atu reafirma Governu nia determinasaun hodi konsolida estratejia desentralizasaun administrativa no kontinua prosesu instalasaun órgaun reprezentativu poder lokal nian.
Rezolusaun Governu ida nee estabelese planu anual sira husi 2025 too 2028, neebe inklui instalasaun servisu Balkaun Uniku iha territoriu nasional tomak, reforsu institusional autoridade munisipiu sira nian, regulamentu lei sira neebe relasiona ho poder lokal no atualizasaun baze-dadus resenseamentu eleitoral nian. Iha etapa sira tuir mai, sei promove kriasaun kondisaun sira hodi halao eleisaun munisipal, kapasitasaun ba prezidente munisipal eleitu sira no avaliasaun ba progresu desentralizasaun nian.
Koordenasaun ba ezekusaun estratejia sei sai hanesan responsabilidade Ministeriu Administrasaun Estatal nian, neebe tenke aprezenta relatoriu semestral kona-ba progresu neebe alkansa ona no dezafiu sira neebe hasoru, hodi garante kontinuidade no efikasia prosesu nian.
Rezolusaun ida nee revoga Rezolusaun Governu anterior nu. 45/2020, loron 9 fulan Dezembru, no tama iha vigor iha loron ida hafoin nia publikasaun.
(gui)
