DILI, STLTIMORLESTE.com – Governu liu husi Konselhu Ministru aprova ona projetu Dekretu-Lei neebe estabelese medida temporariu sira hodi estabiliza folin kombustivel no garante seguransa ba sira nia fornesimentu iha Timor Leste.
Projetu dekretu lei nee aprezenta husi Ministru Petróleu no Rekursu Mineral, Francisco da Costa Monteiro.
“Dekretu nee hakarak mitiga impaktu husi instabilidade internasional atual iha setor enerjetiku, proteje kbiit sosa husi familia sira, hamenus efeitu husi aumentu potensial presu nian iha ekonomia, no garante funsionamentu regular husi atividade ekonomika sira, hodi garante simultaneamente disponibilidade husi kombustivel sira iha teritoriu nasional tomak,” haktuir nota ofisial neebe STL aseu husi governu, kuarta (25/03/2026).
Dekretu nee define limite masimu ba folin konsumidor nian, hodi estabelese folin gazolina nian iha dolar amerikanu 1,50 kada litru, gazoliu ho dolar amerikanu 1,65 kada litru, kombustivel ba aviasaun (avtur) ho dolar amerikanu 2,50 kada litru, no gas petroliferu likidu (LPG) ho dolar amerikanu 4,2 kada kilograma.
Atu garante limite sira nee, importador sira agora sei aprezenta kustu importasaun loloos, neebe sai hanesan baze hodi kalkula subsidiu neebe sei fo husi Estadu, neebe finansia liu husi Orsamentu Jeral Estadu nian.
Dekretu-Lei prevee mos medida sira hodi garante kontinuidade fornesimentu nian, inklui definisaun estratejia sira importasaun nian ba kombustivel esensial sira, iha koordenasaun entre entidade publika sira no operador sira setor nian, no mos posibilidade atu adota mekanizmu sira regulasaun esepsional merkadu nian.
Kona-ba ezekusaun, reforsa daudaun asaun sira husi autoridade kompetente sira, ho atensaun espesial hodi prevene desviasaun husi kombustivel sira neebe subsidiadu iha territoriu nasional nia liur no hodi aplika sansaun sira bainhira laiha kumprimentu.
Entretantu medida sira-nee temporariu no vigora nafatin too tinan nee remata, no bele hetan revizaun, estende ka termina depende ba evolusaun merkadu internasional nian.
(alb)
