DILI, STLTIMORLESTE.com – Primeiru Ministru (PM), Kay Rala Xanana Gusmão relata ba Prezidente Republika katak, Governu aprova ona lei limite idade ba funsionariu.
Primeiru Ministru, Kay Rala Xanana Gusmão ba jornalista sira, bainhira remata halao enkontru semanal ho Prezidente Republika, Jose Ramos Horta iha palasiu Prezidensial, Nicolau Lobato, Bairo Pite, Dili, Kinta (03/04/2025).
“Hau dehan ba Prezidente kata,k horiseik ami aprova dekretu lei ida kona-ba limite idade funsionariu, tanba ami haree ona katak tenke iha sistema neebe regula funsaun publika, hanesan mos ami haree hela sistema ida iha edukasaun, atu book nafatin ho saude lae hatama sai, kontratadu permanente nunee hela laiha konfiansa atu fo kontinua servisu,” dehan PM, Xanana.
Primeiru Ministru dehan, prosesu ida nee sei iha dekretu lei no mai fali sei haree oinsa kona-ba salariu minimu buat sira nee hotu.
“Atu monta tiha sistema hotu se lae hasai tiha kompetensia funsaun publiku nia hau servisu iha nee manan osan maizumenus, hau diretor diak ida, tekniku diak ida mais tanba osan hau husu lisensa sein vensimentu hau ba servisu fali iha neeba nee manan osan barak liu no laos hau nia area,” katak PM, Xanana.
Nunee mos iha loron Kuarta Governu liu husi Konselhu Ministru aprova mos Projetu Dekretu-Lei, neebe aprezenta husi Ministru Prezidensia Konselhu Ministrus, Agio Pereira, no husi Prezidente Komisaun Funsaun Publika, Agostinho Letêncio de Deus, neebe ho uzu autorizasaun lejizlativa neebe hetan husi Lei n. 7/2024, loron 23 fulan-Outubru, halo alterasaun daruak ba Lei n. 8/2004, loron 16 fulan-Junhu, neebe aprova Estatutu Funsaun Publika.
Diploma ida nee estabelese limite tinan 65 nuudar idade obrigatoriu hodi remata relasaun trabalhu funsionárius publikus no ajentes Administrasaun Publika nian, neebe sei akontese automatikamente iha loron neebe trabalhador atinje idade refere. Medida nee hakarak atu promove joven sira ba kuadrus Administrasaun Publika nian, garante renovasaun jerasionál no hadia kualidade no efisiensia servisus neebe presta ba populasaun.
Diploma nee determina mos katak Komisaun Funsaun Publika tenke notifika trabalhador, ninia entidade empregadora no Seguransa Sosiál pelumenus loron 90 molok hakotu funsaun.
(eme)
