DILI, STLTIMORLESTE.com – Governu liu husi reuniaun Konselhu Ministru aprova ona projetu rezolusaun kona-ba termu referensia ba konkursu Mineiru Publiku iha rai laran.
Ministru Petroleu no Rekursus Minerais, Francisco da Costa Monteiro hatete, Konselhu Ministrus aprova projetu rezolusaun Governu, konaba Termu Referensia ba Konkursu Mineiru Publiku ba Konsesaun Lisensa Prospesaun no Peskiza ba Mineral Metaliku, Gemas, Mineral Industrial, Mineral Radioativu no Mineiru no Rai Raru (neebe ladun barak).
Ministru hatete, segundu mak deliberasaun ida mos atu hatoo ba termu da referensia ba Segunda ronda de tenderizasaun internasional blokus minerias nia iha teritoriu Timor laran tomak.
“Iha bloku 39 mak ita sei lansa iha Segunda feira iha komferensia ka simeira internasional ba mineral Gemas neebe akontese loron tolu iha Dili,” dehan nia ba jornalista iha Palasiu Governu, Sabadu (22/11/2025).
Nunee mos Visi Ministru Assuntu Parlamentar, Aderito Hugo da Costa hatete, iha konferensia internasional ida ho partisipasaun, ida nee Ministru Petroleu no Rekursus Minerais iha aproveitamentu ba konferensia internasional nee mos prezensa husi parseiru kompanha ho marka sira famozu tebes iha industria mineras nian nee diak tebes ba Timor.
“Nee mak ohin aprovasaun ida ba autoridade nasional Mineiru nian, atu bele selebra kontratu kontrusaun ba bloku sira mineirus nia, nee segundu faze. Premeiru faze halo tiha ona agora nee segundu faze, atu hatete deit husi premeiru faze nee husi kompanha sira neebe hetan konseisaun ba kontratu sira nee iha bloku balun fo rejultadu positivu ba ita, neemak agora sira tama ba segundu faze atu emisaun ba kontratu sira,” katak nia.
Nunee mos iha Sabado nee Governu liu husi Konsellu Ministrus aprova projetu Rezolusaun Governu, konaba Termu Referensia ba Konkursu Mineiru Publiku ba Konsesaun Lisensa Prospesaun no Peskiza ba Mineral Metaliku, Gemas, Mineral Industrial, Mineral Radioativu no Mineiru no Rai Raru (neebe ladun barak).
Termu referensia sira neebe agora aprova, estabelese enkuadramentu nesesariu hodi halao konkursu publiku iha setor rekursu mineral, tuir Kodigu Mineiru nian, garante regras neebe klaru no transparente no alina ho pratika internasional sira neebe diak-liu. Hafoin loke area sira neebe destina ba atividade mineiru, neebe deside hosi Governu iha fulan-marsu tinan 2023, desizaun ida-nee atu promove oportunidade foun kona-ba investimentu no kria kondisaun ba dezenvolvimentu sustentavel iha setor nee.
Konkursu publiku nee tenke lansa iha semana ikus fulan-novembru nian. Avaliasaun ba proposta sira sei halao hosi fulan-junu too jullu tinan 2026, ho anunsiu rezultadu sira neebe prevee ba fulan Julhu no emisaun ba lisensa sira neebe marka ona ba Agostu 2026.
Jornalista: Emerenciana Pinto
Editora: Domingas Gomes
