DILI, STLTIMORLESTE.com – Visi Primeiru Ministru Dezenvolvimentu Rural no Abilitasaun Komunitaria, Mariano Assanami Sabino hamutuk Gabinete Apoiu Sosiedade Sivil (GASC), ohin asina akordu subvensaun publika ho Cruz Vermelha Timor Leste (CVTL).
“CVTL hanesan lalatak palamera internasional uluk depois agora ita ukun aan, ita iha palamera CVTL, organizasaun ida nee iha fatin hotu-hotu sira sempre apoiu iha tempu difisil, populasaun neebe iha fatin sira neebe funu, sira sempre ba, fatin sira neebe dezastre sira sempre ba, fatin sira neebe povu hasoru problema sira sempre iha neeba, tanba nee mak CVTL mos nafatin ho espiritu ida nee atu bele nafatin haktuir pasu tuir lisaun palamera internasionál nia,” afirma Assanami ba jornalista sira iha Palasiu Governu, Tersa(15/04/2025).
Nia haktuir, lisaun espiritu palamera nia, neebe hanoin katak apoiu neebe kiik, maibe ida nee apoiu neebe signifikante tebes para atu hamoris nafatin espiritu voluntarizmu, espiritu humanizmu, espiritu tulun malu, apoiu malu no koopera malu.
“Ita haree katak iha ita nia sosiedade mihis daudaun ona, tanba nee husu para ba fila fali area rurais sira halo sistema koezaun sosial neebe diak, iha kraik atu bele ajuda malu apoiu malu, joven sira neebe mak karik iha universidade balun iha sekundariu no sira neebe remata eskola bele hamutuk ho CVTL iha espiritu voluntariu,” nia dehan.
Nia tenik, misaun ida nee CVTL bele kontinua haburas valores ida nee, tanba pasu istoriku valores ida neebe mak mai husi istoria rezistensia, ita hakarak nafatin kuda iha ita nia jerasaun ba jerasaun, para sira bele hatene foti lisaun ida nee aprende iha responbilidade hanesan nain ba rai ida nee.
Iha fatin hanesan, Koordenador Gabinete Apoiu Sosiedade Sivil, Joaquim da Costa Freitas hatoo parabens ba CVTL neebe Governu TL hili sai hanesan parseiru implemetasaun iha programa sira neebe durante nee sira halo ona.
“Ami husi ekipa Sosiedade Sivil hakarak hatoo parabéns ba CVTL neebe mak Governu eskolha hanesan parseiru estratejiku iha implementasaun programa sira neebe mak liga direitamente ho komunidade nia moris, espera katak valor neebe iha kontratu nia laran bele utiliza didiak iha ninia ezekusaun Governu estabelese parseria ho CVTL,” katak koordenador GASC nee.
Entretantu, Sekretariu Jeral Cruz Vermelha de Timor Leste (CVTL), Luis Pedro Pinto hatoo agradese ba IX Governu Konstitusional neebe konsidera ona proposta neebe mak sira hatoo ona.
(EST 2)
