BAUKAU, STLTIMORLESTE.com – Governu liu husi Ministeriu Edukasaun hamutuk ho ekipa Ministeriu Administrasaun Estatal lansa asistensia teknika ba prestasaun servisu estrutura Autoridade Munisipal no Autoridade Administrativu Atauro iha Munisipiu Baukau.
“Hau ohin mai fo apoiu ba Ministeriu Administrasaun Estatal ba programa tekniku prestasaun servisu estrutura Autoridade Munisipal, liu-liu atu haree nivel nasional bele fo apoiu ba nivel Munisipal atu nunee bele iha prestasaun servisu diak liu atendimentu ba komunidade,” hateten Ministra, Dulce de Jesus Soares iha Vila Antiga Baukau, bainhira remata serimonia abertura, Kinta nee (12/06/2025).
Governante nee esplika, programa asistensia teknika refere importante tebes, tanba atu eleva prestasaun servisu iha nivel Munisipal neebe servisu sira nivel nasional dezentraliza ona ba Autoridade Munisipal sira tuir programa Ministeriu Administrasaun Estatal neebe estabelese iha nivel Munisipal.
Nunee mos hanesan programa Ministeriu Edukasaun programa merenda eskolar no konsensoens eskolar dezentraliza ona iha nivel Munisipal no uir planu sei kontinua dezentraliza tan programa seluk ba Munisipiu sira hodi empodera liu tan atendimentu servisu iha nive Munisipal.
“Entaun iha prosesu dezentralizasaun presisa Ministeriu rua servisu hamutuk liu liu tun mai ho PAM sira atu garante katak implementasaun programa sira nee laos atu haree deit ezekusaun Orsamentu, maibe prestasaun servisu responde duni tuir objetivu husi programa sira,” katak Ministra Dulce.
Diretor Jeral Dezentralizasaun Administrativa no Governu Lokal, Antonio Augusto Guterres hateten, lansa asistensia teknika ba prestasaun servisu estrutura Autoridade Munisipal iha Baukau importante ba Governu Sentral atu hatene progresu servisu durante tinan rua nia laran.
Tanba Governu Sentral deside hodi delegasaun kompentensia servisu Munisipal 19 kompostu Servisu Munisipal Saude, Edukasaun, Agrikultura no seluk tan ba Autoridade Munisipal sira atu atende nesesidade komunidade.
Aliende mos asistensia teknika hakarak hatene funsionamentu fasilidade hanesan traktor durante nee no rezultadu husi natar no toos, kondisaun infraestrutura irigasaun sira iha territoriu nasional inklui total estudante asesu programa merenda eskola no promove setor privadu iha area rural no seluk tan neebe Governu atribui ona.
“Objetivu nee atu hatene atividades hirak nee lao duni iha baze ga lae, ida nee mak objetivu atu lori Governu besik ba povu. Kredivel no forte liu tan prepara ba rezolusaun Governu nian kona-ba kondisaun minimas,” hateten Antonio.
Nia sublina, asistensia teknika ba prestasaun servisu estrutura Autoridade Munisipal no Autoridade Administrativu Atauro foku ba servisu sira neebe Governu atribui ona ba kada Munisipiu jere, nunee liu husi asistensia teknika ba prestasaun servisu atu hatene no tetu molok ba avaliasaun kondisaun minimas no implementa poder lokal iha tinan 2027 ba Munisipiu neebe priense ona kriteiru.
Prezidente Autoridade Munisipiu Ermera, José Martino dos Santos Soares konsidera, programa asistensia teknika prestasaun servisu ba estrutura Autoridade Munisipal importante, tanba bele hakbiit kapasidade servisu Administrasaun Autoridade Munisipiu hodi hein prosesu avaliasaun kondisaun minimas hafoin implementa poder lokal.
Kona-ba implementasaun poder lokal Munisipiu Ermera preparadu, tanba iha ona kapasidade rekursu umanu no infraestrutura hein ba implementasaun.
Entertantu atividade asistensia teknika ba prestasaun servisu estrutura Autoridade Munisipal no Autoridade Administrativu Atauro realiza iha salaun Sentru Konsensoens Vila Antiga Baukau neebe partisipasaun masimu husi Autoridade Munisipiu 12 inklui Munisipiu Atauro.
(tom)
