DILI, STLTIMORLESTE.com – Sekretariu Estadu Formasaun Profisional no empregu(SEFOPE) liu husi Diresaun Nasional Empregu Externu (DNEE) ho Governu Australia liu husi programa Pasific Australia Labour Mobility (PALM), ohin entrega linha internet ba munisipiu 14.
Sekretariu Estadu Formasaun Profisional no Empregu, Rogeiro Araujo Mendonça hatete, linha internet neebe mak fasilita husi Governu Australia liu husi programa PALM neebe servisu hamutuk ho SEFOPE hodi fasilita ona empregador ho kompanhia Star Link hodi fasilita internet ba iha munisipiu 14.
“Serimonia ida ohin nee importante tebes, serimomia nee halo termu entrega linha internet husi Governu Australia liu husi programa PAlM ba diresaun no munisipiu sira hotu, ita hatene katak formasaun neebe mak agora ita lori ona ba munisipiu, ita nia kandidatu neebe mak barak Update sira nia profile presiza linha intenet,” dehan SEFOPE, Rogeiro Araujo Mendonça ba jornalista sira iha Maubara Room, Sesta (23/05/2026).
Nia konta ,iha tinan hirak liu ba joven hotu konsentra iha kapital, nunee internet nee lori fila fali ba iha diresaun munisipiu sira, atu nunee bele hakman joven sira, joven rihun 55 neebe mak halo ona teste, signifika kandidatu sira nee sei presiza mai update sira nia profile iha sistema.
“Governu Australia ajuda tebes Governu Timor Leste liu husi SEFOPE hodi halo atendimentu publiku ba kliente sira neebe mak presiza update sira nia profile, nunee empregador sira neebe mak iha Australia bele asesu ba kandidatu sira atu entrevista, sira neebe mak liu bele ba servisu iha Australia,” katak nia.
Nia mos husu nafatin ba iha diresaun munisipiu sira neebe mak uza linha intenet ida nee uza ho responsabilidade, oportunidade neebe mak fo ona mai tenke uza ho kuidadu hodi halo atendimentu ba publiku sira neebe mak presiza.
Iha fatin hanesan, Embaixadora Autralia iha Timor Leste (TL), Penny Roberts afirma, objetivu prinsipal atu loke asesibilidade ba iha teritoriu laran tomak atu fo oportunidade ba Timoroan hotu atu asesu ba programa mobilidade laboral, nee marka aspetu importante tebes.
“Loron ohin iha signifikadu tebes no loron ida nee impaktu boot tebes liu-liu ba iha komponente ba siensia, inkluzivu no transparente ba iha programa mobilidade laboral iha nee, atividade ohin loron marka sirkula katak posibilidade oportunidade laos loke deit iha Dili, maibe ita sei loke luan iha munisipiu hotu,” dehan Penny Roberts
Nia mos hatoo agradesimentu ba SEFOPE, tanba primeira vez husi ajensia governu nia neebe fo prioridade ba konetividade no marka importansia asesibilidade atu fahe informasaun sira neebe relevante ba Timoroan sira bele asesu ba informasaun rekerimentu ba programa mobilidade laboral nee rasik.
“Ami haree teknologia ka IT hanesan xave importante ba iha mobilidade laboral, ida nee nakloke ba ita nia esforsu atu hetan inovasaun koko halo dalan ou buka meius inobra nian nunee bele hametin no haburas programa mobilidade Laboral no abilidade, molok too iha faze ida nee la fasil iha esforsu barak husi komponente hotu, tanba nee fo agradese ba kompontente husi SEFOPE nian neebe involve atu halo atividade ida nee sai realidade ba esforsu tomak,” Penny hakotu.
EST 1
