DILI, STLTIMORLESTE.com – Konselhu Ministru halao sorumutu iha Palasiu Governu deside ona dekreta Lutu Nasional iha territoriu Timor Leste tomak, nuudar sinal tristeza ba Sua Santidade Papa Francisco nia mate.
Ministru Prezidensia Konselhu Ministru (MPKM), Agio Perreira hateten, periodu Lutu Nasional nee sei hahu iha tuku 10 dadeer iha loron 22 fulan Abril no remata iha meia noite iha loron 28 fulan-Abril.
“Durante periodu Lutu Nasional, Bandeira Nasional tenke hasae too klaran deit iha edifísiu publiku hotu-hotu, inklui embaixada, konsuladu no reprezentasaun sira seluk estadu nian iha estranjeiru, no mos iha roo sira Estadu nian,” hatete Ministru Agio Perreira hafoin remata enkontru Konselhu Ministru Estraordinariu iha Palasiu Governu, Tersa nee (22/04/2025).
Sua Santidade Papa Francisco mate iha loron 21 fulan Abríl tinan 2025, tuku 7:35 dadeer iha nia rezidénsia, iha Sidade Vatikanu.
Governu rekonhese katak dever Estadu nian, lori povu Timoroan nia naran, hatudu sentidu gratidaun no rekonhesimentu neebe boot, hodi presta omenajen ida neebe merese ba lider boot Igreja Katolika nian.
Iha komunikadu neebe fo sai horisehik, loron 21 fulan-Abril, Governu hodi nia naran rasik no hodi povu Timoroan nia naran, hatoo sentidas kondolensias ba Igreja Katólika, ba Koléjiu Kardeál sira nian, ba povu Arjentinu no ba sarani sira hotu iha mundu tomak.
Sua Santidade Papa Francisco hanesan lider espiritual ida neebe ho influensia boot tebes-tebes ba umanidade, defensor neebe la kole ba sira neebe vulneravel liu no promotor dame, justisa no fraternidade nian entre povu sira.
(alb)
