DILI, STLTIMORLESTE.com – IX Governu liu husi Konselhu Ministru deside Universidade Katolika Timorense (UCT) mak organiza formasaun ho lian Português ba profesor sira iha Timor Leste.
Kestaun nee hatoo husi Ministru Ensinu Superior Siensia no Kultura, Jose Honoroi Jeronimo ba jornalista sira bainhira remata halo enkontru ho Prezidente Republika Jose Ramos Horta iha Palasiu Prezidensial Nikolao Lobato, Bairo Pite, Kuarta nee (06/08/2025).
Nia hatete, Governu deside Universidade Katolika Timorense (UCT) mak organiza formasaun ho lian Português ba profesor sira iha Timor Leste.
Ministru hatete, Governu liu husi Konselhu Ministru deside no loke eskola rais nee kooperasaun entre Governu Timor-Leste ho Governu Federativu Brazil.
“Eskola rais nee ninia objetivu mak nee; forma profesor sira iha area Português. Desizaun Konselhu Ministru, UCT mak atu organiza, ministeriu transfere osan ba ona, Governu tau purvolta US$ 365 mil iha tinan liu ba fo ba UCT atu organiza,” informa Ministru Ensinu Superior Siensia no Kultura.
Ministru hatete, atu transferensia osan nee mos ministeriu tenke halo dekretu lei halo tiha hotu ona Prezidente Republika promulga ona, ministeriu asina akordu sira hodi transfere osan.
Nia hatete, horsehik hasoru malu ho reitor UCT seminariu iha Palasiu Prezidensial kona-ba artifisial intelejen sira hatete ba iha 13 Agostu halo lansamentu.
Ministru dehan, UNTL mos iha kursu lian Português mais ida nee jeral, ida halo daudaun ho eskola rais nee ba deit Timoroan neebe hakarak duni koalia Português no hanorin ho Português, tanba dala barak koalia fali ema nia lian, mais lakohi koalia TL nia lian nee mak problema.
Nia haktuir tan katak, lo-loos nee Timoroan koalia lian rua deit, Tetun, Português, seluk importante mos mais la refleta Timor.
“Hau hanoin nee diferensia oituan, la hanesan, ita halo formasaun ba profesor sira iha nivel sekundariu no mos pre-primaria nee importante la halimar, ita haree ba futuru,” katak nia.
Hanesan mos ministeriu iha hela profesor nain sia, Timoroan nain neen, Brazil ida, Portugal nain rua, neebe mos halo hela formasaun lian Português ba profesor sira iha universidade privadu sira, haree ba kotuk oituan, bainhira Timor ukun aan, joven sira la koalia Português, mais ohin bele hatete iha purvolta 26% Timoroan sira koalia Português.
“Ita tenke kontinua ida nee, atu dehan Português kontestu Timor-Leste mos ita ba nafatin,” dehan Ministru.
Tanba koalia Tetun sein Português mos Tetun nee la vale, lian rua nee importante hotu ba Timoroan sira, neebe formasaun sira nee espesial deit ba profesor Timoroan neebe hakarak tama no hakarak funu sai profesor, tanba sai profesor nee la fasil, ema tenke oferese nia aan tomak, servisu duni, dedika nia aan tomak ba profisaun ida nee, hanorin diak duni, Timor presiza ida nee, tanba nee mak rekrutamentu neebe halo mos la barak ida.
Nunee mos halo rekruta barak mais dala ruma mai nia rezultadu la diak, tanba nee mak desizaun Konselhu Ministru nian, la entrega ba UNTL, desizaun Konselhu Ministru entrega ba UCT mak organiza.
(eme)
One Response
Muito melhor, por mais facilitam os professores.