DILI, STLTIMORLESTE.com – IX Governu Konstitusional esforsu atu hadia povu nia moris, maske lao neineik maibe beibeik hodi luta ba povu nia moris diak.
Kestaun nee hatoo husi Primeiru Ministru, Kay Rala Xanana Gusmão ba jornalista sira bainhira remata halo enkontru semanal ho Prezidente Republika Jose Ramos Horta iha Palasiu Prezidensial Nikolao Lobato, Bairo Pite, kinta (24/07/2025).
Nia hatete, Governu esforsu aan makaas hodi bele hadia povu nia moris maske lao neineik maibe beibeik.
Primeiru Ministru hatete, hasoru malu Prezidente diskute mos kona-ba oinsa harii dormitoriu ba foinsae sira atu hela iha Palasiu Prezidensial nia sorin laos gratuita bele selu oituan oituan nunee bele fasilita foinsae sira halao sira nia estudu.
“Dormitoriu boot ida ba estudante sira mai hela laos gratis selu oituan oituan nee Emiratus Arabe Unidos, lo-loos nee halo iha madre sira Balide, maibe tanba fatin klot entaun mai halo iha Palasiu Prezidensial kotuk, horiseik hau too hau haree hau dehan SEATOU mate ona maibe prezidente mak dehan,” katak PM Xanana.
Primeiru Ministru hatete, Governu koko halo buat hotu nunee bele tulun netik povu kiik sira nia moris, no hadia mos infraestrutura.
“Nafatin hadia netik buat ruma ba povu nia moris nunee mos dala ruma ita hanoin no fatin barak presiza tebes asesu ba eletridade, estrada, bee, tanba hau lembra fali uluk 25% populasaun la hetan eletrisidade, tama fali Julhu 2023 populasaun neebe la asesu komesa ona,” katak PM Xanana.
Xefe Governu hatete, problema infraestrutura baziku importante liu mak ahi eletrisidade, estrada, nee importante tebes, tanba nee prezidente husu atu kontinua nafatin too fim do ano ita bele muda buat balun lao neineik maibe beibeik.
Primeiru Ministru hatete, bainhira povu la asesu infraestrutura, povu hakilar katak maske Timor ukun aan ona maibe povu sei hasoru integrasaun nafatin, tanba la asesu ba ahi eletrisidade, bee moos no estrada, ho esforsu hirak nee Governu sei esforsu aan nafatin maske neineik maibe beibeik. “Sei esforsu aan nafatin atu hadia nafatin povu nia moris ida nee,” katak Xanana.
Aleinde nee Primeiru Ministru mos koalia ho Prezidente Republika oinsa mak kria empregu ba joven sira iha rai laran.
“Hau mos koalia ho Prezidente oinsa kria empregu, informa mos ba Prezidente tinan oin mai nee lao haleu ona atu haree prepara daudaun ona rai nain sira bele kaer daudaun ona hodi ita bele lao neineik mais beibeik,” katak PM xanana.
(eme)
