DILI, STLTIMORLESTE.com – Governu aprova rezolusaun estende suspensaun ensinu aprendizajen no partika atividade Grupu Arte Marsiais (GAM) too 2025.
Konselhu Ministru halao sorumutu iha Palásiu Governu, Kuarta nee (30/10/2024), aprova projetu rezolusaun Governu neebé estende too loron 10 Abríl 2025, suspensaun ba ensinu aprendizajen no prátika arte marsiais no enserramentu temporáriu ba fatin no instalasaun hotu-hotu neebe destinadu ba ensinu aprendizajen no pratika artes marsiais, neebe inisialmente hetan aprovasaun husi Rezolusaun Governu n. 17/2024, loron 24 fulan Abril.
Rezolusaun Governu nian nee ho objetivu atu konsolida no reforsa pas sosial neebe alkansa ona husi kedas fulan Novembru tinan 2023. Ho abordajen ida neebe konsideradu no kontroladu, hakarak atu iha futuru, permite pratika artes marsiais nian iha deit kontestu desportivu, hodi promove ezersísiu saudavel no kontribui ba edukasaun no formasaun sívika no umanista ba joven sira. Maibé, iha tempu ida nee, nafatin mantein suspensaun ba ensinu aprendizajen no prátika artes marsiais no enserramentu temporariu ba ninia fasilidade sira.
Governu felisita populasaun, liu-liu joven sira ba kolaborasaun neebe sira presta ona hodi kumpre Rezolusaun Governu nu, 17/2024, loron 24 fulan Abríl, neebe kontribui tebes ba manutensaun orden no pas sosial iha pais laran tomak.
(gui)
