DILI, STLTIMORLESTE.com – Parlamentu Nasional (PN) liu husi Bankada FRETILIN deklara, IX Governu Konstitusional falha implementa kompromisu sira atu hadia povu nian moris, tanba povu sei halerik ba bee moos, edukasaun, saude no seluk tan.
“Ami tenke hatete duni IX Governu Konstitusional falha kumpri nia kompromisu politiku atu hadia povu nia moris, falha atu hamosu empregu permanente no dignu ba joven sira, falha atu hadia edukasaun ba povu kiak nia oan sira, falha fornese aimoruk neebe sufisiente ba hospital sira no rezolve tusan ba hospital sira iha rai liur, no falha atu fo solusaun ba problema sira hotu iha setor saude,” hatete Xefe Bankada FRETILIN, Aniceto Guterres iha ambitu debate OJE 2025 iha faze jeneralidade iha PN, Kuarta (06/11/2024).
Nia hatutan, Governu mos falha atu evita favoritismu, manipulasaun no korupsaun iha setor administrasaun publika no infraestrutura durante 2023 no 2024 nia laran, no falha atu fornese ai-haan baratu ba povu hanesan hatudu iha relatoriu husi Integrated Food Security Fhase Clasification (IPC), katak husi Novembru 2023 too Setembru 2024 populasaun Timor Leste 27% ka 364.000, enfrenta menus ai-haan no tanba presu ai-haan aumenta no falhansu sira seluk-seluk tan.
“Ida nee mak dehan kualidade ezekusaun, too ohin loron IX Governu ignora, no pior liu tan lakohi rekonhese falhansu hirak nee, no soe fali kulpa ba VIII Governu hodi taka sira nia falha no própria inkapasidade atu fo solusaun ba problema, hanesan Sua Exelénsia Primeiru Ministru rasik hatete sai ba publiku katak, tinan oin 2025 mak IX Governu foin lao lo-loos, tanba tinan ida nee sei hadia no halo auditoria ba VIII Governu nia sala sira,” hatete nia.
(alb)
