DILI, STLTIMORLESTE.com – Governu liu husi ekipa konjunta hahu diskute preparasaun sira atu simu Primeiru Ministru (PM) Malazia, Anwar Ibrahim, neebe tuir ajenda sei vizita Timor Leste iha loron 22 Setembru nee.
Visi Primeiru Ministru no Ministru Koordenador Asuntus Ekonomiku no Ministru Turizmu no Ambiente, Francisco Kalbuadi Lay hatete, objetivu husi enkontru nee mak atu halo koordenasaun kona- ba preparasaun ba simu Primeiru ministru Malazia.
“Ohin ami halo reuniaun konjuntu ida, lidera husi Primeiru Ministru rasik, maibe entrega servisu nee mai hau hamutuk ho Xefe Gabinete Primeiru Ministru nian, Adjunta Kaza Sivil no Diretor Jeral no inklui Xefe Protokolu estadu nian atu koalia kona-ba preparasaun ba iha vizita Primeiru Ministru Malazia mai atu vizita Timor Leste iha fulan ida nee, iha loron 23 no 24,” hatete Visi Primeiru Ministru, Francisco Kalbuadi Lay ba jornalista sira, iha Palasiu Governu, Dili, Kinta ( 11/09/2025).
Governante nee hatutan, presiza halao preparasaun neebe diak hodi simu Primeiru Ministru Malaziia nian, tanba ninia vizita haree kondisoens hotu-hotu neebe iha molok simu Timor Leste hanesan nasaun membru ASEAN.
“Anwar Ibrahim neste momentu asumi hela kargu hanesan Prezidente ba ASEAN nian mai vizita Timor Leste atu haree rasik ho nia matan no inklui mos sira nia ekipa, tanba nia hanesan Prezidente ba ASEAN nian, pelu menus antes adezaun nee nia mai konhese tiha Timor no haree Timor Leste nia situasaun,” dehan nia.
Jornalista: Alberto Menezes
Editora: Carme Ximenes
