DILI, STLTIMORLESTE.com — Governu orienta ona kompanhia balu hahu konstrui drainajen iha area Kaikoli, liu-liu husi iha RTTL sorin, Komando Polisia Nasional Timor Leste (PNTL) Munisipiu Dili oin sae ba notariadu Munisipiu Dili nian.
Konstrusaun drainajen nee hanesan meius ida atu kanaliza bee sira tun husi foho lolon Balide nian tun mai sidade iha tempu udan. Bee husi Balide nian tun mai Kaikoli liuhusi valeta antigu ida iha pompa bensin Kaikoli sorin tun mai intipidu iha area Sentru Saude Vera Crus nian hodi fakar ba estrada laran no hamosu inundasaun iha area Kaikoli tanba sistema drainajen iha area Kaikoli no Balide nian seidauk funsiona ho diak.
Tuir Vitorino de Jesus, bee tun foho lolon Balide nian iha tempu udan boot tebes, bee sira nee liuhusi estrada Balide nian tun ba Kaikoli liuhusi estrada ba ba SEFOPE nian, balu liu estrada tun ba respartisaun Munisipal nian, maibe tanba drainajen iha area hirak nee diak bee mout nee, so nalihun deit iha fatin neebe klean, maibe husi eskola sekundaria oin tun ba mosu iha Sentru Saude Vera Cruz oin no intipidu iha area Kaikoli hodi hamosu inundasaun grave kuandu udan ho intensidade boot.
“Ita espera ho konstrusaun drainajen kontinua ba too Ministeriu Justisa oin, nunee ho drainajen foun neebe konstroi daudaun husi ponte kais nian sae mai Liceu bele liga kedas ho drainajen boot Ministeriu Justisa oin,” dehan Vitorino ba STL iha Balide, Dili, Kuarta (4/3/2026).
Inundasaun neebe akontese iha Sidade Dili, tuir Vitorino mai husi sistema drainajen neebe seidauk diak, drainajen sira iha area balide nian, funsiona iha area balu deit, hodi kanaliza bee sira husi foho lolon Balide nian, maibe iha parte balu, laiha drainajen, nunee iha tempu udan bee husi foho lolon sira tun mai tama kedas ba estrada hodi hamosu inundasaun.
“Iha tempu udan, estrada Balide nee hanesan mota, liuliu iha pertigaan ba too eskola sekundaria Unamet oin, ita liu la diak, tanba estrada hanesan tiha mota,” dehan Vitorino.
Nia dehan drainajen husi Balide nian tenke liga kedas ba drainajen husi Kolmera nian sae repartisipasaun Munisipal nian, nunee bele akomula bee husi balide no matadoru nian, kuandu drainajen nee laiha ligasaun udan tun bee intipidu no hamosu inundasaun.
Nunee mos Kevin prefere governu konsentra hadia sidade Dili nuudar kapital nasaun nian livre husi inundasaun iha tempu udan. Sidade Dili atu livre husi inundasaun dalan uniku mak hadia drainajen sira neebe seidauk diak, konstroi area neebe laiha drainajen.
“Ita haree governu sobu-sobu hela deit la para, mas la tau atensaun mos ba drainajen sira, nee labele rezolve problema sidade nian hanesan inundasaun,” komenta Kevin.
(god)
