DILI, STLTIMORLESTE.com – Governu hahu halo ona pagamentu subsidiu kolokasaun inisial transporte ba kandidatu profesores faze primeiru no segundu, hahu ona iha fulan nee.
Liafuan nee haktuir husi Diretora Rekursu Umanu Ministériu Edukasaun, Anita Tavares ba jornalista sira liu husi konferensia imprensa iha ME, Sesta nee (22/11/2024).
Nia dehan, prosesu pagamentu salariu subsidiu kolokasaun no subsidiu transporte ba profesores foun bolsa kandidatu nian neebe koloka iha etapa primeiru, segundu no terseiru iha tinan 2024, iha kolokasaun faze dahuluk no daruak husi prosesu bolsa kandidatu faze primeiru konsege halo pagamentu hotu inklui salariu fulan-fulan husi dia 14 Maiu.
“Subsidiu kolokasaun inisial no subsidiu transporte prosesa no halo ona pagamentu iha fulan Novembru, no osan tama ona ba idak-idak nian konta bankaria,” dehan Anita.
Anita informa, ba profesores sira husi prosesu kolokasaun dahuluk no daruak, karik salariu no subsidiu sira seidauk tama iha konta bankaria, husu atu informa lalais mai DNRH hodi haree tuir fali prosesu nee ba profesores sira kolokadu iha etapa 2, atu aselera prosesu submisaun lista prezensa kada fulan mai ME-DNRH, neebe asinadu husi Diretor Eskola idak-idak, iha eskola privadas, publikus no eskola Cafe. Ba profesores kolokadu iha etapa 3 tenke mos aprezenta ho lista prezensa kada fulan, labele liu husi dia 15 Dezembru 2024. Pagamentu sei iha prosesu no sei tama iha fulan Dezembru.
Nia hatete, prosesu pagamentu iha faze dahuluk iha profesores hamutuk 443, neebe bacharelatu iha 51, lisensiatura 393. Bacharelatu sei simu 278.00, lisensiatura 288.00, sira nian salariu normal ona. Ba faze segundu nian hamutuk 665, bacharelatu 106 no lisensiatura 559. Profesores neebe foin koloka iha faze terseiru, ida nee seidauk halo pagamentu, maibe sira sei tama iha prosesu.
Total ba iha salariu, subsidiu transporte no subsidiu kolokasaun inisial foin halo pagamentu nee hamutuk US$ 1,063,377.00.
(jac)
