DILI, STLTIMORLESTE.com – IX Governu Konstitusional bainhira harii iha ona hanoin oinsa atu hadia setor justisa iha Timor Leste neebe sai polemika iha rai laran.
Lia hirak nee hatoo husi Primeiru Ministru Kay Rala Xanana Gusmão ba jornalista sira, bainhira remata halo enkontru ho Prezidente Republika Jose Ramos Horta iha Palasiu Prezidensial Nicolao Lobato, Bairo Pite, Kinta (03/04/2025).
“Ida nee koalia dala barak ona iha nee, ema balun dehan Doutora Lucia Lobato seidauk iha poder, Governu tama dehan setor neebe buka hadia nee setor justisa, maibe setor justisa kuandu ita atu hadia ita temi karik dehan ida nee sira nia haree ba lei, ida nee enjenaria nia halo uma halo estrada, enjenaria Timor ida nia tetun la hatene halo bolu fali Indonezia halo, se Indonezia la hatene halo Xina ida koalia nee halo, ida lei nee hadia ho juis, Indonezia Japaun, Koreia, ida nee mak tenke komprende didiak hadia justisa nee laos imediatamente maibe mediu prazu,” dehan PM Xanana.
Primeiru Ministru dehan, tinan kotuk haruka Timoroan nain 50 ba estuda iha Portugal, no foin lalais husi Doutor Lucia Lobato nia gabinete ba tan estuda. Tanba sira ba nee ho teste ida português, tanba juis sira mai husi universitariu Jakarta, Surabaya, português ladun, sira ba iha neeba tinan ida para aprende.
“Mais hau mos dehan beibeik iha serimonia ida atu haruka sira, doutora medika ida atu ba estuda mos konaba lei tanba sa? Hau fo lembra fali ba imi Amu Dasbachk ninia julgamentu hau bolu advogadu balun, ami ba beibeik ajuda tanba sa? Tanba justisa, se mak kondena Amu Dasbachk nee, ema balun, ho ida nee mak ONG sira nee mak ba fali hanesan reprezentante halo sala buat barak la diak tebes, no juis karik simu osan hau la hatene, hau labele dehan, prokurador simu osan hau la hatene, halo tuir deit hakarak haree Maria, Maria labarik kiik oan ida rona iha dia 1 Janeiru, oras 10 bolu mai nia inan aman dehan labarik sei kiik nee labele, maibe nee kontra lei, se ONG dehan labele hamutuk ho sira ba tiha, dehan hau la hatene buat ida,” katak PM Xanana.
Aleinde nee halo visum ba labarik neebe ho idade 14 no 15, too ikus labarik moras no labarik ida mate tan, buat sira nee hotu akontese tanba hakarak hadau Orfonatu besik portu nee, tanba hakarak atu halo Hotel boot ida iha neeba.
“Agora ami akompanha beibeik ultimo dia Juis lee akordu nia foin lee hau dehan too ona, saida mak nia lee hau hatene ona ONG sira mak hakerek,” katak PM Xanana.
Primeiru Ministru dehan, problema kona-ba rai nee problema barak tebes mak halo julgamentu la justu inklui mos problema seluk tan.
Tanba nee Governu bolu hela atensaun oinsa mak bele kurizi buat balun neebe mak naksalak, maibe juis dehan sira mak manda.
Nia dehan, se la forma ema ba setor justisa, aban bainrua tuur malae sira mak hakerek deit lei entaun susar.
(eme)
