BAUKAU, STLTIMORLESTE.com – IX Governu Konstitusional neebe lidera husi Primeiru Ministru (PM), Kay Rala Xanana Gusmão hakarak kontinua implementa programa kreditu suavel ba empreza kiik sira.
Diretor Nasional Apoiu Dezenvolmentu Mikro Pekenas no Empreza, Reinaldo Borges hatete, Ministeriu Komersiu no Industria liu husi Diresaun Nasional Apoiu Dezenvolvimentu Mikro Pekenas no Emprezas halo ona preparasaun hahu ho Estudu Diagnostiku neebe implementa ona iha rejiaun Oeste, Sentral inklui Leste no daudaun halo ona preparasaun ba lei hodi reativa hikas programa kreditu suavel, tanba orienta husi Primeiru Ministru.
“Ema hotu hakarak tenke reativa kreditu suavel, signifika kreditu suavel importante duni atu hasae kresimentu ekonomia ba empreza kiik sira, tanba nee politika Governu no orientasaun Primeiru Ministru kreditu suavel tenke lao,” hateten Reinaldo Borges ba jornalista sira iha Vila Antiga, Baukau, Kuarta (23/04/2025)
Nia deklara, programa kreditu suavel implementa iha tinan 2021 husi VIII Governu Konstitusional, maibe too tinan 2023 bainhira pose ba IX Governu Konstitusional hapara programa refere, tanba estrutura foun.
Maibe iha tinan 2025 IX Governu Konstitusional hakarak atu implementa hikas, tanba haree programa kreditu suavel iha vantajen ba empreza kiik sira hodi hasae kresimentu ekonomia.
“2025 nee atu hahu fali, mais dekretu lei ba kreditu suavel iha hela Konselhu Ministru hein aprovasaun ita bele kontinua,” Reinaldo Borges akresenta.
Nia fundamenta, bainhira programa kreditu suavel atu reativa hikas, parte Diresaun Nasional Apoiu Dezenvolvimentu Mikro Pekenas no Emprezas liu husi Ministeriu submete ona dekretu lei ba Konselhu Ministru, tanba tenke hetan uluk aprovasaun, nunee bainhira Konselhu Ministru aprova ona sei hahu hikas no mantein ho juru 3% kada tinan aplika ba empreza kiik neebe asesu kreditu suavel.
Nia esplika, rekezitu ba kreditu suavel sei prepara husi Banku Nasional Komersiu Timor Leste (BNCTL – sigla português), tanba fundu aloka liu husi BNCTL no Governu regula atu fo benefisiu ba empreza kiik sira hodi expande atividade negosiu ba kresimentu ekonomia sustentavel.
Entretantu empreza kiik neebe asesu programa kreditu suavel dadaun hamutuk 47 iha territoriu nasional.
(tom)
