DILI, STLTIMORLESTE.com – Governu liu husi Ministeriu Interior (MI) daudaun nee halo ona konstrusaun postu foun ba Unidade Patrolhamentu Fronteira (UPF) iha linha Fronteira, atu nunee sira bele halo Patrolhamentu no vizilasia neebe ho diak.
Postu Unidade Patrolhamentu Fronteira (UPF) barak mak kondisaun aat.
“Agora ita tama ona prosesu konstrusaun ba postu foun nee,” hatete Ministru Interior (MI), Francisco da Costa Guteres ba jornalista sira iha Ministeriu Interior, Kinta (07/08/2025).
Nia dehan, kontrusaun foun ba Postu Unidade Patrolhamentu Fronteira (UPF) neebe kondisaun aat, agora daudaun Governu liu husi Ministeriu Interior (MI) halo konstrusaun foun no balun sei halo instalasaun eletrisidade no bee.
“Agora ita halo instalasaun ahi, instalasaun Internet, instalasaun bee no ekipamentu sensitivu neebe mak ita sei instala iha Fronteira para atu ajuda halo patrolhamentu no halo vizilansia neebe mak diak, tanba ita hakarak taka ita nia Fronteira para ema labele tama arbiru,” nia esplika.
Nia tenik, portaun entrega nee mos tenke jere ho didiak, atu nunee estrajeiru sira neebe mai iha Timor Leste nee intensaun mai para investe no servisu diak no iha balun mos mai hodi intensaun pasiar nee ho diak no haree rai.
“Laos balun mai ho intensaun halo krimi, halo problema, ida nee mak ita tenke kontrola didiak, tanba ita agora vistu turista nee tama mai livre, maibe ita mak tenke kontrola didiak no tuir sistema neebe ita perepara ona, sira uza sistema deit iha portaun depois mak sistema detekta ema neebe ba ona diak ou lae,” nia deklara.
Nia informan, daudaun nee governu sei perepara sistema nee, tanba nee lori tempu, tanba sei servisu hamutuk hodi Governu Austrália para atu hadia ida nee.
Nia hatutan, wainhira turista sira mai Timor Leste, antes tama Timor Leste sistema detekta ona ninia identidade katak, sira mai husi nasaun ne’ebe no sasan saida mak nia lori mai.
“Sistema wanhira ita monta ona nee ita tenke hatene pasajeiru ohin mai nee husi nasaun neebe no aleinde mai husi Bali, maibe antes nee mai husi neebe mak uluk, ita tenke buka hatene hotu sira nia informasaun para antes sira mai Timor nee, sistema nee detekta hotu, ita hatene uluk katak ema nee laiha buat ruma entaun ita bele fo tama,” nia koalia.
Antes nee Diretór Ezekutivu Fundasaun Mahein (FM), Nelson Martins informa, atu prevene atividade tama ilegál iha fronteira presiza kria kondisaun ba membru UPF, tanba sira neeba kondisaun postu aat, tanba nee governu persiza mos halo kontrusaun ba postu foun nee aseleira lalais.
“Area Fronteira nee luan tebes, depois ita menus ekipamentus, menus rekursu umanu, ida nee biban ba kriminozu sira bele asesu tama sai ho fasil, ida nee halo violensia ba ita nia lei,” katak nia.
Nia informa, atividade entrada ilegal akontese iha fronteira tanba komunidade neebe hela fronteira nee nesesidade bázika no depende liu ba iha nasaun vizinhu, tanba asesu besik no lalais maske sira hakat ilegál.
Tanba nee governu foun presiza tau atensaun kria merkadu iha linha fronteira hodi fasilita komunidade, no polísia sira nafatin koloka hodi halo kontrolu deit.
(jen)
