DILI, STLTIMORLESTE.com – Governu liu husi Konselhu Ministru hasai ona rezolusaun ida, hodi hadia administrasaun publika liu-liu haree ba setor saude no edukasaun.
Kestaun nee hatoo husi Primeiru Ministru, Kay Rala Xanana Gusmão ba jornalista sira, bainhira remata halao enkontru semanal ho Prezidente Republika, iha Palasiu Prezidensial, Nicolau Lobato, Bairo Pite, Dili, Kinta (23/10/20250).
“Horiseik mos hasai rezolusaun ida kona-ba iha Julhu 2023, Julhu 2024, no 2025 tinan rua nia laran nee hamutuk ho komisaun funsaun publika hakarak hadia administrasaun publika, nomos haree ba iha setor rua ida mak edukasaun area ida mak saude, atu fo sira nia estatutu espesial neebe foin dadauk komisaun funsaun publika serbisu makaas duni serbisu hau louva tebes, tanba ita haree ona sistema dala ruma ita dehan osan la selu, mais ita harii tiha sistema hadia tiha sistema se mak atu ba hanorin, se mak atu ba trata moras hatene ona katak, nia iha ona sistema ida nia laran lae arbiru deit nee mak Komisaun Funsaun Publika serbisu kapaas tebes, hasai ona rezulusaun ida atu ho karakter trazitoriu tanba ita hakarak hadia derepente deit ita hakarak buat hotu ita halo milagre,” dehan PM, Xanana.
Primeiru Ministru hatete, presiza hadia sistema tanba profesores sira laos oituan, tanba nee Komisaun Funsaun Publika haree hamutuk ona ho Ministeriu Edukasaun haree hotu ona se mak kleur hanorin iha neeba oinsa.
Oras nee profesores barak mos moras hela, tanba ferik katuas ona maibe balun hatama fali prpfesores voluntariu ida nee mak susar ,tanba nee mak hadia ona sistema no sei kontinua nafatin.
“Nunee mos sei haree ba saude nian, tanba ita hatene ita iha ona pesoal saude barak maibe susar,” dehan Xefe Governu.
Nunee mos Konselhu Ministru aprova projetu Dekretu-Lei, neebe aprezenta husi Ministra Edukasaun, Dulce de Jesus Soares, kona-ba Rejime Esepsional ba Promosaun Bazeia ba Antiguidade ba Pesoal Integradu iha Karreira Dosente.
Kareira dosente nian, neebe regula hosi Dekretu-Lei No. 23/2010 hosi loron 9 fulan-Dezembru, hetan revizaun iha tinan 2023 hosi Dekretu-Lei No. 31/2023 hosi loron 31 fulan-Maiu, neebe simplifika sistema hosi teste sira avaliasaun nian ba objetivu asesu no promosaun nian, hodi kria teste avaliasaun kompetensia obrigatoriu hanesan mekanizmu progresaun primariu.
Agora daudaun, profesor rihun-ida liu, maski sira nia dedikasaun no kontribuisaun ba dezenvolvimentu sistema edukasaun nasional, iha hela nível ikus hosi sira ida-idak nia klase no besik atu too idade reforma nian.
Medida ida nee tuir Dekretu-Lei Numeru 9/2025, loron 30 fulan-abríl nian, neebe estabelese limite idade ba terminasaun empregu iha Administrasaun Publika iha tinan 65, hodi garante katak profesor sira neebe besik reforma haree sira nia kontribuisaun ba edukasaun nasional hetan rekonhesimentu.
Lei nee mos estabelese katak promosaun esepsional sira sei hahu iha loron 1 fulan-novembru tinan 2025, ba profesor sira neebe kobre iha faze dahuluk, no iha loron 1 fulan-janeiru tinan 2027, ba sira neebe kobre iha faze daruak.
Jornalista: Emerenciana Pinto
Editora: Carme Ximenes
