DILI, STLTIMORLESTE.com – Governu Timor Leste (TL) liu husi Ministru Petroleu no Rekursus Minerais ho parseru Internasional, realiza Forum Timor Leste Mining and Petroleum summit iha Jl Word, Area Branka, Dili.
Ministru Petroleu no Rekursus Minerais, Francisco da Costa Monteiro hatete, Governu Timor Leste ho parseru realiza forum no ohin ba Segunda ronda kona-ba tender bloku minerais nian.
“Ohin nee loron daruak eventu ida ba loron tolu nian bolu simeira ba enerjia, mais ida nee ita foka liu ba oil gas, mining ho bisnis forum, horseik ita hahu ho lansamentu ba segunda ronda tender ba bloku minerais nian, ohin ita foku ba minerais nian,” dehan MPRM, Francisco ba jornalista sira, iha JL Word, Area Branka, Dili, Tersa (25/11/2025).
Governante nee hatutan, ba loron segundu nia Governu Timor Leste ho Woodside mos sei asina akordu kooperasaun ida atu foka ba LNG Timor nian, neebe Timor-Leste iha tinan barak halo tiha ona servisu, kontinua estuda sira neebe nesesariu halo preparasaun lubuk ida ona.
Tanba nee konvida hela Woodside sira hakarak ona, sira mak espresa sira nia hakarak nee hodi bele partisipa iha prosesu nee, hodi ikus mai loke buat hotu-hotu, entermus estudu sira nee ikus mai sira mos bele halo desizaun ida definitivu ona iha tinan oin konaba dada kadoras mai nee ka lae, ka sira hakarak partisipa dada kadoras mai nee.
“Neebe prosesu mak ida nee duni, nee hanesan sai tiha eventu ida, maibe simeira nee rasik lori ema barak husi investor sira, espesialista sira husi nasaun barak tebe-tebes mais 20 nasaun mak iha nee hodi bele diskute fahe informasaun, no mos halo koneksaun nee atu bele halo investimentu iha nee ka bisnis sira bele forma parseiru,” dehan nia.
Aleinde nee Publiku kontinua duvida kona-ba dada kadoras mai oinsa parte Ministru nia hanoin kona-ba ida nee, hatan ba kestaun nee Ministru hatete, dada kadoras mai Timor Leste nee prosesu ida laos ohin koalia ohin dada kedas.
“Imi rona ona husi Primeiru Ministru horisehik, buat nee prosesu ida, laos buat ida ohin ita atu koalia aban ita halo ona. Importante mak imi haree katak governu polítiku klaru nafatin, polítika firme nafatin, esforsu sira neebe ita halo, ita tenta nafatin, buka meius hotu-hotu nunee investor sira ida ezistente sira nee no mos karik foun sira bele hamutuk ho ita, nunee realiza ita nia vizaun no ita nia polítika ida nee,” hatete governante nee.
Nunee mos Prezidente Republika, Jose Ramos Horta kontinua nafatin reafirma no mos konfirma Timor Leste nia pozisaun kona-ba dada kadoras mai Timor-Leste.
Aleinde nee Tinan oin Timor Gap ho nia parseiru sira hanesan Woodside sei halo perfurasaun posu ida, depois hamutuk ho finder mos sei halo perfurasaun no mos halo dezenvolvimentu ba kampu ida naran Jahal tasi nian sira mos sei halo perfurasaun hamutuk ho nia parseiru ba konsorsiu sira nee haree kona-ba petroleu nian nee. Maibe iha maneirus nee mos halo servisu bara-barak hela tinan ida ka tinan rua oin mai bele hela dezenvolvimentu balun-balun.
Forum nee marka mos Prezensa husi Prezidente Republika, Jose Ramos Horta, Ministru Ministru Petroleu no Rekursus Minerais, Francisco da Costa Monteiro no membru Governu seluk, Korpu Diplomatiku, nomos parseru dezenvolvimentu husi nasional no internasional no partisipante seluk tan.
Jornalista: Emerenciana Pinto
Editora: Carme Ximenes
