DILI, STLTIMORLESTE.com – Daudaun nee Governu liu husi Ministeriu Interior (MI) husu autorizasaun ba Konselhu Ministru (KM) halo promosaun ba Ofisiál Superiór ba Polisia Nasional Timor Leste (PNTL).
Nia dehan, Governu halo ona promosaun deviza trazitoria ba membru polísia husi deviza ajente too inspetór, no sira hamutuk 2.747 hetan ona.
“Faze tuir mai mak ami agora prepara hela pedidu ida para submete ba Ministru Interiór lori ba Konsellu Ministru hodi hetan autorizasaun no halo mos promosaun ofisiál Superior ba membru PNTL sira neebe mak agora iha hela nee,” hatete Prezidente Komisaun Promosaun Deviza Rranzitoriu, Paulo Assis Belo ba jornalista sira iha Komando Jeral PNTL Kaikoli, Tersa nee (06/05/2025).
Nia teknik, MI sei lori pedidu ida ba Konselhu Ministru atu nunee Komando PNTL bele halo promosaun ba Ofisial Superiór husi Postu Superimtente too ba Superintendente Xefe Polísia.
Nia esplika, horiseik iha serimonia Empozisaun Deviza Promosaun Tranzitoria no Promosaun Por Antiguidade nomos ba Membru PNTL Komando Jerál no Membru PNTL Diresaun Jerál Servisu Migrasaun hamutuk 400 – resin.
Nia informa, promosaun nee labele ba sira ajente too Inspetór deit, maibe ba sira neebe ho Superintendente Assistenste too ba Superintendente Xefe.
“Depoia promosaun trazitoria faze tuir mai mak hau hanoin nee tuir mai Komando tenke halo promosaun mos ba ofisiál superiór sira iha estatutu pesoal PNTL haruka katak , depois promosaun trazitoria deviza ba ajente too inspetor nee koalia klaru MI sei halo pedidu autorizasaun ba Konselhu Ministru hodi autoriza katak, fo biban ba Komando PNTL halo promosaun ba sira ofisiál no superiór sira,” nia deklara.
Nia hatutan, ba membru PNTL neebe agora iha deviza Superintendente Assistenste bele promove ba Superintendente Polísia no Superintendente Polísia bele promove ba Superintendente Xefe Polísia.
“Sira nee sei halo promosaun iha tinan ida nee, tanba ita kuandu promosaun ba ajente polísia ba too Inspetór Xefe inklui husi Inspetór Xefe Polisia ba Superintendente Assistenste, entaun sira ida Superimtente mos iha direitu tenke halo promosaun,” nia argumen.
Tuir informasaun neebe STL asesu katak, ba deviza Superintendente Xefe sira iha 17 pesoas no nain neen (6) tama ona idade reforma no agora polísia ho deviza Superintendente Xefe nee iha deit nain 11 nomos ba deviza Superintendente nee agora iha ema nain 23, enkuantu ba deviza ho Superintendente Assistenste nee iha 24, maibe ida mate no agora iha deit nain 23.
(jen)
