DILI, STLTIMORLESTE.com – Governu husu Ministeriu Saude (MS) atu aloka ona orsamentu hodi selu lalais dividas neebe Governu iha ba hospital sira iha Indonezia, Malazia no Singapura, nunee ba oin hospital sira nee bele iha konfiansa hodi simu nafatin pasiente husi Timor Leste.
Tuir Visi Ministru Asuntu Parlamentares, Aderito Hugo katak, iha tinan 2025 Governu aloka ona orsamentu kuaze tokon US$ 18 hodi selu dividas sira iha hospital estranjeiru hanesan iha Indonezia, Malazia no Singapura, no tau mos orsamentu atu kontinua halo kontratu foun ho hospital iha nasaun tolu nee.
Aderito dehan, Governu aloka ona orsamentu atu selu dividas sira, tanba nee kona-ba dividas seidauk selu nee kompetensia Ministra Saude mak bele fo resposta.
“Maibe Governu aloka ona orsamentu 2025 atu selu dividas sira por volta tokon US$ 18 ba hospital sira iha Indonezia, Singapura no Malazia. Ministra Saude aloka orsamentu ba hospital sira nee para kontinua nafatin fo konfiansa hodi fo atendimentu ba ita nia nesesidade atu halo transferensia pasiente sira husi ita nia rain ba liur,” hatete Aderito Hugo ba jornalista sira iha PN, Kinta (06/02/2025).
Nia hatutan, iha tinan 2024 selu ona dividas balu no tinan 2025 Governu aloka nafatin osan hodi selu dividas, maibe molok selu presiza halo uluk verifikasaun ba dividas neebe mak iha hospitais sira.
“Agora ita boot sira hatene osan ida boot hanesan nee mos atu sai deit mos laos fasil, maibe tenke verifika kuitansia sira nee mai ho valor tokon US$ 18, mai husi tinan sira uluk governasaun sira anterior tau hamutuk, entaun tenke verika lai,” dehan governante nee.
Nia hatutan, Governu presiza aloka nafatin orsamentu atu selu dividas sira nee hodi hatudu vontade estadu nian atu halo tratamentu adekuadu ba pasiente sira neebe labele trata iha rai laran, tanba ekipamentu no doutor espesialista sira seidauk sufisiente atu haree moras oin-oin neebe iha.
Tanba Ministeriu Saude hetan ona orientasaun no halo ona kontaktu ho hospital sira iha Darwin, nunee iha futuru mai bele transporta pasiente sira ba halo tratamentu saude iha neeba, tanba besik no kustu mos kiik.
No hospital sira neebe antes nee Governu halo ona akordu hanesan Malazia, Singarpura no Indonezia nee ho aviaun presiza oras barak foin too, maibe ba Darwin la too oras ida too ona.
Iha fatin hanesan, Prezidente Komisaun F neebe trata Assuntu Saude Seguransa Sosiais no Igualidade Janeiru iha Parlamentu Nasional (PN), Maria Bareto katak, Governu liu husi Ministeriu Saude oras nee halo hela verikasaun faktura ho hospital estranjeiru sira neebe mak kontratu ho Governu Timor Leste molok halo pagamentu ba dividas neebe iha.
(alb)
