DILI, STLTIMORLESTE.com – Governu planu implementa programa ekonomia azul diak, maibe sosiedade sivil husu presiza diversifika ekonomia no gastu osan tuir dalan.
Kestaun nee hatoo husi Diretor Ezekutivu HAK, Feliciano da Costa ba jornalista sira iha nia knaar fatin Farol, Dili, Kuarta (04/02/2026).
Nia hatete, koalia kona-ba ekonomi Azul nee vizaun neebe antes kedas, signifika hakarak atu eleva setor hotu-hotu oinsa mak atu halo poupansa ba iha orsamentu rasik ho gastu neebe efetivu.
“Komitmentu ida durante nee koalia hela kona-ba diversifika ekonomia nee presiza toma atensaun ida nee, se ita koalia ekonomia azul atu hatete buat ida mak nee, liu-liu laos dehan katak ita iha osan atu gasta ou ita iha osan para bele realiza programa deit, maibe oinsa mak gasta osan tuir nia dalan, signifika saida, signifika katak osan neebe ita husu nee ezekuta duni tuir nia dalan, uza osan tuir programa neebe mak ita atu hatete karik dehan efisiensia no efikas,” dehan nia.
Feliciano hatete, seluk mak presiza atu haree sukat kapasidade sira neebe mak jere rekursu refere, signifika se mai deit ho rekursu ida deit husi fundu minarai ka fundu petroleu nia oinsa mak bele dezenvolve tan ekonomia sira seluk.
“Durante nee ita hanoin katak ita husu osan para implementa programa maibe oinsa mak hanoin katak husu osan depois hatama osan, hau fo ezemplu ida mak se koloka karik osan ba iha turizmu nia oinsa mak bele rasta fila fali ema ka buat ida karik atrai ema bele mai vizita ita nia rai, tanba ita nia fatin hanesan turizmu neebe furak iha ema nia matan mai haree, ida nee mos investimentu kiik ida hanesan rendimentu ka income,” katak nia.
Diretor HAK nee mos esplika, koalia ekonomia azul nee dala barak ema hanoin katak hakarak atu hetan osan barak maibe presiza haree osan neebe mak iha utiliza ho diak.
Nunee mos Prezidente Republika (PR) Jose Ramos Horta hatete, Governu neebe lidera husi Primeiru Ministru (PM) Kay Rala Xanana Gusmão mos deklara ona katak sei iha ekonomia azul, ida nee politika neebe diak tebes.
Iha biban nee Prezidente Republika husu sidadaun hotu-hotu hadomi meiu ambiente, husu labele sunu rai arbiru no soe lixu iha fatin.
“Hau kontente rona ida nee, ita hotu-hotu tenke fo dedikasaun makaas ba meiu ambiente, labele sunu ai laran arbiru, labele soe lixu arbiru, tanba buat nee kestaun saude laos deit kestaun turizmu,” dehan PR Horta.
(eme)
