DILI, STLTIMORLESTE.com – Primeiru Ministru (PM) Kay Rala Xanana Gusmão hamutuk ho membru IX Governu konstituisional halo inaugurasaun edifisiu foun ba Balkaun Uniku iha Autoridade Munisipiu Dili, hodi lori administrasun besik liu ba povu.
“Balkaun Uniku nee ajuda tebes-tebes hodi fasilita servisu administrasaun nia, fasilita komunidade sira neebe mak hela dook no presiza Balkaun Uniku nee, iha rejiaun hotu iha prestasaun servisu ba populasaun tomak, nee duni inaugura Balkaun Uniku nee diak tebes-tebes ba instituisaun estadu nia,” dehan PM, Xanana liu husi nia diskursu hafoin halo inaugurasaun ba Balkaun Uniku iha Kaikoli, Dili, Kinta nee (03/04/2025).
Iha fatin hanesan, Ministru Administrasaun Estatal (MAE), Tomas do Rosario Cabral hatutan, Balkaun Uniku nee importante tebes hodi fasilita komunidade sira, nunee atu tama ba ASEAN presiza mos sistema dijitalizasaun.
“Fatin nee Governu Sentral kria para lori atendimentu besik liu ba populasaun, rejistu hotu-hotu husi finansas reforma sosial ema neebe iha direita atu hetan pensaun aban bainrua mai iha sistema, nunee bele identifika ita nia ema nee, lo-loos nee hira mak iha direitu ba benifisiariu sira nee,” katak MAE, Tomas Cabral.
Nia haktuir, Balkaun Uniku nee importante iha Governu Sentral, sei kria kondisaun sira nee ho dekretu governu nia ho linha ministeriu hotu neebe fo ona servisu sei tau sira nia ema iha sentru atendimentu nee.
“Iha Balkaun Uniku nia laran mos iha profile munisipiu sira para ita bele hatene unidade geografika lo-loos nee hira, suku hira eskola hira, sentru saude nee hira, tanba nee mak Balkaun Uniku nee importante iha Governu Sentral nia, aleinde nee kada Balkaun Uniku Governu oferese mos kareta ida para sira halo dezlokasaun tuir populasaun sira neebe laiha kbiit atu lao mai,” tenik MAE, Tomas.
Governante nee haktuir tam katak, iha 2025 Balkaun Uniku nee sei remata iha territoriu Timor laran tomak ho sentru modernizasaun ida iha Ministeriu Administrasaun Estatal sei halo konstrusaun boot ida iha sentru, nunee aban bainrua rekolha informasaun husi territoriu nasional tomak sei tama iha neeba.
“Iha munisipiu lima mak Balkaun Uniku remata no uza ona iha Munisipiu Aileu, Manufahi, Ainaro no Kovalima, sei remata iha fulan Maiu ou Junhu, depois kontinua fali ba Munisipiu Bobonaro, Ermera ,Oekusi, Lautem no Vikeke sei remata iha tinan ida nee nia laran hodi halo sentru atendimentu ,” tenik nia.
Enkuantu, fundus ba Balkaun Uniku Munisipiu Dili 5% ho orsamentu US$ 152 mil no 3 milhau nee mai husi Uniaun Europeia liu husi Kamara Munisipal, nee laos deit ba Balkaun Uniku, maibe atu organiza mos ba semiteriu iha Dili laran, organiza espasu iha Dili laran, inklui restaurante iha tasi ibun neebe mak konstrusaun agora daudaun lao hela, nee pakote ida neebe apoiu husi Uniaun Europeia liu husi Câmara de Lisboa
(EST 2)
