BAUKAU, STLTIMORLESTE.com – Governu liu husi Visi Ministru Asuntu Parlamentares Inaugura uma memoria esperansa sobrevivente iha Suku Builai, Postu Administrativu Baukau Vila, Munisipiu Baukau.
Visi Ministru Asuntu Parlamentares, Adérito Hugo hateten, konstrusaun uma memoria esperansa ba sobrevivente iha Suku Builai konstrui husi Sentru Nasional Chega Instituto Publiku (CNC.IP), neebe nuudar ajensia Estadu Timor Leste nian neebe iha, atu tau matan ba sobrevivente sira nian problema husi funu no terus iha tinan barak nia laran.
“Apoiu Estadu nian ba Sr. Francisco ida nee jestu Estadu nian hanesan Estadu soberanu obra ida nee transforma husi Domin ba Sr. Francisco nia dedikasaun vida tomak too fim iha Suku ida nee, husi canal CNC nia servisu ba reparasaun ba vitima guerra Sr. Francisco hetan oferta simples ida,” Adérito Hugo liu husi diskursu, bainhira inaugura uma memoria esperansa, iha Builai, Segunda (22/12/2025).
Nia sublina, uma memoria esperansa neebe Governu liu husi CNC.IP konstrui ba benefisiariu sobrevivente Francisco iha Suku Builai ho valor orsamentu liu rihun US$ 14 no Governu kontinua planu atu konstrui uma hanesan ba sobrevivente sira seluk, maibe sei tuir eskalaun neebe daudaun kontinua prepara iha CNC.IP, tanba nee husu atu hein ho pasiensia.
Nia haktuir, Prezidente Republika no Primeiru Ministru Timor Leste tau atensaun makaas ba problema sira neebe daudaun sobrevivente sira infrenta, tanba nee kontinua husu ba setor apoiu sosial hotu atu avansa ho rapidu posivel atu labele tarde.
“Orientasaun Primeiru Ministru nian klaru tebes, asistensia karakter hanesan nee labele tarde, ezemplu ida mak ohin Sr.Francisco iha nee hau koalia nia la rona tanba nia kondisaun lapermite ona, hau bele hanoin Primeiru Ministru sempre hateten ba ami hotu asistensia sosial sira tenke lais diak liu para sira haree,” Adérito katak.
Iha fatin hanesan familia benefisiariu Domingos Lopes Ximenes agrasede ba Governu, tanba aloka ona orsamentu liu husi CNC.IP konstrui ona uma foun, ba sobrevivente Francisco neebe durante tinan naruk hela iha uma kondisaun aat.
“Durante nee hela uma tali, maibe ohin loron entrega ona uma foun ba ami nia katuas ami husu agradese barak,” Domingos espresa.
Entretantu uma neebe Governu aloka orsamentu liu husi CNC.IP konstrui husi Orsamentu Jeral Estadu 2025 ho total rihun US$ 14 resin responde ba konstrusaun kuarta toba fatin 3, dala 1, varanda 1, fatin sanitasaun 1 no kompleta dapur ida.
Jornalista: Tomas Reis
Editora: Carme Ximenes
